Maymunchechak uchun testi ijobiy chiqqan hindistonlik erkak BAAdan qaytganidan bir necha kun o‘tib, xususiy shifoxonada vafot etdi. Bu haqda mamlakat sog‘liqni saqlash vazirligi xabar bergan.

Qayd etilishicha, bemorda virus xorijda bo‘lganida aniqlangan, biroq uning oila a’zolari test natijalarini Hindiston shifoxonasiga o‘z vaqtida yubormagan.

“Avvaliga 22 yoshli yigitda maymunchechak alomatlari bo‘lmagan. U Birlashgan Arab Amirliklaridan (BAA) Hindistonga qaytib kelgan va u erda 19-iyul kuni maymunchechak uchun test sinovi o‘tkazildi va u ijobiy chiqdi. Uning qarindoshlari test natijalarini juda kech berishgan. Uyga kelganidan keyin biroz vaqt o‘tgach, isitmasi ko‘tarilgan. Shundan so‘ng bemor kasalxonaga yotqizilgan va keyinroq ventilyatorga ulangan. Yigit 30- iyul kuni vafot etdi. O‘lim bo‘yicha tergov o‘tkaziladi, chunki maymunchechakdan o‘lim darajasi juda past”,– deydi Kerala shtati sog‘liqni saqlash vaziri Vina Jorj.

Shuningdek, hozirda vafot etgan bemor bilan aloqada bo‘lgan shaxslar va uning yaqin qarindoshlari shifokorlar nazorati ostiga olingan.

Ma’lumot uchun, maymunchechak kamdan-kam uchraydigan virusli infeksiya bo‘lib, u odamlar orasida ham yuqadi. Bu odatda yengil holat bo‘lib, ko‘pchilik bir necha hafta ichida tuzalib ketadi, ammo ba’zilarida asoratlar paydo bo‘lishi mumkin. Maymunchechakning dastlabki belgilariga isitma, bosh og‘rig‘i, mushak og‘rig‘i, bel og‘rig‘i, shishgan limfa tugunlari, titroq va charchoq kiradi.

Shuningdek, ba’zi joylarda toshma paydo bo‘lishi mumkin, ko‘pincha yuzdan boshlanadi va keyin tananing boshqa qismlariga tarqaladi.

• Hindiston
• Maymunchechak
• O'lim