Joriy yilning 4–7-avgust kunlari ot sportining konkur yoʻnalishi boʻyicha “Maxima Master Eurasia” turnirining 4-bosqichi boʻlib oʻtadi. Unga Moskva viloyatining “Horseka”(sobiq “Ivanovskaya”) ot sporti majmuasi mezbonlik qiladi.

Xalqaro turnirda Oʻzbekiston sharafini Bekzod Qurbonov, Bahromjon Gaziyev, Nurjan Tuyakboyev, Umid Komilov, Aʼzam Tolliboyev, Xurshidbek Alimjonov kabi mahoratli chavandozlarimiz himoya qilishadi.

Bundan tashqari, yoshlar oʻrtasida ham musobaqalar tashkil etilishi rejalashtirilgan boʻlib, ushbu yoʻnalishda Boburjon Valijonov hamda Dilshod Shakirovlar gʻoliblik uchun bahs olib borishadi.

Musobaqa dasturiga koʻra, bugun 140 sm balandlikdagi gran-pri oʻtkazilgan. Ertaga 150 sm balandlikdagi “Maxima Masters Eurasia” gran-pri kubogi, shuningdek, yakshanba kuni 150 sm balandlikdagi “Maxima Masters Eurasia Team Competition” yoʻnalishlari boʻyicha ikki bosqichda bahslar boʻlib oʻtadi.

Qayd etish mumkin, Turnirning jamoaviy bahslari Millatlar ligasiga oʻxshash tarzda tashkil etilgan boʻlib, avvalgi bosqichlar aprel oyida Toshkent shahrida, may oyida esa Bishkek shahrida oʻtkazilgan va ularning har ikkisida ham Oʻzbekiston vakillari gʻoliblikni qoʻlga kiritishgan.

Maʼlumot uchun, keyingi bosqich oktyabr oyida Moskva yaqinidagi “Maxima Park” ot sporti majmuasida boʻlib oʻtadi.

• Ot sporti
• O‘zbekiston