Oxirgi 5 yil davomida O‘zbekistonda korrupsion qilmishni sodir etib, jinoiy javobgarlikka tortilgan mansabdor shaxslar soni 14 mingdan oshgan.  

Bu haqda Adliya vaziri Ruslanbek Davletov kecha, 16 dekabr kuni bo‘lib o‘tgan “O‘zbekiston prokuraturasi: kecha, bugun va ertaga” mavzusida tashkil etilgan ilmiy-amaliy konferensiyadagi chiqishida ma’lum qildi.

– Shulardan 160 nafardan ortig‘i respublika miqyosidagi, 1 ming 270 nafardan ortig‘i viloyat miqyosidagi hamda 13 ming nafardan ortig‘i tuman miqyosidagi mansabdor shaxslar ekanligi prokuratura organlarining korrupsiyaga toqatsizlik borasidagi faoliyat ko‘lami qay darajada ekanligini ko‘rsatadi.

2021-yilning o‘tgan 6 oyida 140 mingdan ortiq fuqaroning murojaati hal etilib, 23 mingga yaqin shaxsning buzilgan huquqlari tiklandi.

Shunday bo‘lsada, tan olib aytish kerak, faqatgina prokuraturaning bir o‘zi qonuniylikni to‘liq ta’minlay olmaydi. Bu jarayonlarda boshqa organlar ham, jamoatchilik ham faol ishtirok etishi kerak.  Nazorat-tekshiruv sohasi hali hamon islohotga muhtoj. Bu o‘rinda biz bugungi kunda respublikadagi turli davlat boshqaruv organlari tarkibidagi 50 dan ortiq nazorat-tekshiruv idoralarini nazarda tutayapmiz. Ularning 10 dan ortig‘i o‘zlari tekshirishi kerak bo‘lgan vazirlik va idoralarga bo‘ysunadi.

Bir idorada ham tekshiruvchi, ham tekshiriluvchi bo‘ladigan bo‘lsa, bu yerda manfaatlar to‘qnashuvi ortidan qandaydir qonun buzilish holatlari kelib chiqadi, – deb qayd etdi vazir ma’ruzasida.

Shuningdek, Adliya vaziri bugungi kunda Adliya organlari va prokuratura o‘rtasidagi hamkorlikda 3 ta kodeks – Jinoyat, Jinoyat-prosessual hamda Jinoyat ijroiya kodekslari ustida birgalikda ish olib borilayotganini ta’kidladi.

• Adliya
• Jinoyat