Joriy yil 4 va 8-noyabr kunlari Urganch va Navoiy xalqaro aeroportlarida aholi vakillarining jadvalda bo‘lmagan aviaqatnov uchun to‘planishgani haqida xabarlar tarqalgan edi. Ma’lum bo‘lishicha, mazkur holatga “i fly airlines” aviakompaniyasining tegishli ruxsatnoma olmasdan turib aviachiptalarni sotish amaliyotini olib borgani sabab bo‘lgan.

Transport vazirligi Matbuot xizmatining ma’lum qilishicha, mazkur rus aviakompaniyasiga 2020-yil oktyabr oyida ogohlantirish xati yuborilgan, ammo tashkilot tegishli talablarni qo‘pol ravishda buzishda davom etgan.

Joriy yil 9-noyabr kuni “O‘zaviatsiya” agentligi tomonidan “i fly airlines” aviakompaniyasiga sanksiya tariqasida O‘zbekistonga charter parvozlarini amalga oshirishni vaqtinchalik to‘xtatish to‘g‘risida qaror qabul qilindi. Aviakompaniyalar tomonidan bunday holatlar takrorlangan taqdirda “O‘zaviatsiya” agentligi parvozlarni amalga oshirish uchun berilgan ekpluatatsiya ruxsatnomalarni bekor qiladi.

“i fly airlines” aviakompaniyasi, jumladan, tegishli ruxsatnomalarni olmasdan qo‘pol ravishda talablarni buzib, 2021-yil noyabr oyida Moskva – Urganch – Sankt-Peterburg – Urganch – Moskva, Navoiy – Moskva hamda Sankt-Peterburg – Navoiy – Sankt-Peterburg yo‘nalishlarida charter parvozlari uchun aviachiptalar sotuvini tashkil etgan. Natijada aviachiptada ko‘rsatilgan vaqtda yo‘lovchilar aerovokzallarga kelishgan va belgilangan yo‘nalishda parvozning bajarilmasligi yo‘lovchilar o‘rtasida ijtimoiy keskinlikka olib kelgan.

• Aeroport
• O‘zbekiston
• Rossiya