Endilikda “Wizzair” aviakompaniyasi O‘zbekistonga reyslarida o‘zbek tilida xizmat ko‘rsatishni ta’minlaydigan bo‘ldi.

Havo transportida xavfsizlik qoidalari hamda ma’lumotlar barcha yo‘lovchilar uchun aniq va tushunarli berilishi muhim. Uchish davrida xavfsizlik qoidalari haqidagi ma’lumotlar xorijiy tilda berilishi esa yo‘lovchilarni tushunmovchilik va yoki qiyinchilikka olib kelishi mumkin.

Raqobatni rivojlantirish va iste’molchilar huquqlarini himoya qilish qo‘mitasi R.Kusherbayevning “Samarqand-Abu-Dabi” yo‘nalishi bilan “Wizzair” aviakompaniyasi tomonidan ko‘rsatilgan xizmatlardan foydalanganda aynan shunday muammoga duch kelgani yuzasidan qoldirgan murojaatini ko‘rib chiqqan.

Olib borilgan o‘rganishlarda murojaatchining uchish davrida aviakompaniyaning ekipaj a’zolari tomonidan xorijiy tilda xavfsizlik qoidalari haqida ma’lumot berilgani, bu qoidalarni o‘zbek va rus tillarida tushuntirib berishlari so‘ralganida xodim tomonidan unga nisbatan qo‘pol muomalada bo‘lingan, bortni tark etishni talab qilingan va shu tarzda fuqaro mazkur reysda Abu-Dabiga yetib borgani ma’lum bo‘lgan.

Shundan so‘ng, qo‘mita tomonidan Transport vazirligiga o‘rganishlar yuzasidan so‘rov xati yuborilgan. Natijada o‘zboshimchalik bilan xatti-harakatlarni amalga oshirgan mazkur aviakompaniya xodimlariga nisbatan chora ko‘rilgan.

Shuningdek, aviakompaniya 2025-yilda O‘zbekistonga xizmat ko‘rsatuvchi har bir havo kemasida bort kuzatuvchi va xizmat ko‘rsatuvchi personallar o‘zbek tilida faoliyat yuritishini yo‘lga qo‘yilishi ta’minlanadi.