Ozarbayjonning Minval nashri saytida Rossiyaning Kaliningrad shahri Kyonigsberg deb nomlangan maqolalar paydo bo‘ldi. Masalan, yangiliklardan biri “Rossiya Kyonigsbergda S-400 va zarba beruvchi tizimlarni joylashtirdi” sarlavhasi bilan chop etildi. Boshqa maqolalarda esa Orenburg shahri O‘rinbor, Volga daryosi esa Itil deb atalgan.

Minval Rossiyaning TASS axborot agentligi tomonidan Ozarbayjonning Qorabog‘dagi Xonkendi shahrida rassom Ivan Ayvazovskiy haykalining buzilishi haqida chiqqan xabariga javob tariqasida shunday yozdi. TASS o‘z xabarida sovet davridagi toponimlar — Qorabog‘ o‘rniga Tog‘li Qorabog‘ va Xankendi o‘rniga Stepanakert nomlarini ishlatgan.

Ozarbayjon Tashqi ishlar vazirligi norozilik bildirib, TASS’dan uzr so‘rashni talab qildi. Vazirlik bayonotiga ko‘ra, davlat axborot agentligi tomonidan “Stepanakert” nomining qo‘llanilishi mamlakat hududiy yaxlitligiga nisbatan hurmatsizlik va haqorat sifatida qabul qilinadi.

Shuningdek, Tashqi ishlar vazirligi o‘z bayonotida, o‘zaro javob chorasi sifatida, Ozarbayjon Rossiyadagi ayrim toponimlarni o‘zining tarixiy nomlari bilan atashidan ogohlantirdi.

TASS axborot agentligi Ozarbayjonning tanqidiga javoban xabar matniga o‘zgartishlar kiritdi.

• Bayonot
• Ozarbayjon
• Rossiya
• Tashqi ishlar vazirligi