Toshkent va O‘zbekistonning boshqa shaharlarida elektr ta’minotidagi uzilish munosabati bilan aeroportlar faoliyati vaqtincha to‘xtatildi. Bu haqda Uzbekistan Airports ma’lum qildi.

Xususan, “Toshkent” aeroportida “Toshkent – Nur-Sulton” yo‘nalishi bo‘yicha HY-721 reysi bo‘yicha uchayotgan yo‘lovchilarning hammasi ham ro‘yxatdan o‘tish, bojxona va pasport nazorati va xavfsizlik ko‘rigidan o‘ta olmagan. Olmaota – Toshkent yo‘nalishi bo‘yicha HY-762 reysi Navoiydagi muqobil aerodromga yo‘l oldi.

Shuningdek, Air Astana aviakompaniyasining Olmaota-Toshkent yo‘nalishi bo‘yicha KC-127 reysi ekipaji jo‘nab ketgan aeroportiga qaytishga qaror qilgan.

Uzbekistan Airports bergan ma’lumotlarga ko‘ra, Namangan, Andijon, Farg‘ona, Termiz, Qarshi, Urganch, Buxoro, Nukus va Samarqand aeroportlarida elektr energiyasi bilan bog‘liq muammolar kuzatilmoqda. Ayni paytda elektr energiyasi faqat Navoiy aeroportida mavjud.

Elektr tarmoqlarini ta’mirlash ishlari tugallangach, aeroportlar yana ishlay boshlaydi. 

• Aeroport
• Toshkent