“Forbes” nashrining yozishicha, O‘zbekiston AQSH bilan eng maqbul mamlakat savdo maqomini olish uchun muzokaralar o‘tkazmoqda. Chunki AQShning Rossiyaga qarshi joriy qilingan sanksiyalaridan O‘zbekiston jabr ko‘rmoqda, buni qoplash uchun Qo‘shma shtatlar savdo munosabatlarida yangi imkoniyatlar taqdim etishi kerak.

Qayd etilishicha, bunday maqom AQShning boshqa davlatlar bilan savdo munosabatlarini tartibga solib, mavjud cheklovlarni bekor qilish, boj tariflarini kamaytirishni taqozo etadi. Mazkur tamoyil keyinchalik Jahon savdo tashkiloti faoliyati uchun asos bo‘lib xizmat qilgan.

Qoida tariqasida JSTga a’zo bo‘lgandan so‘nggina mamlakatga ushbu maqom taqdim etiladi. Ammo O‘zbekiston JSTga kirguncha ham AQSh O‘zbekiston tovarlariga, hech qursa to‘qimachilik sanoatiga o‘z bozorini ochishiga umid bildirmoqda:

“2020-yilda AQShning O‘zbekistondan asosiy importi kumush, qalampir va ba’zi kimyoviy moddalar bo‘ldi. O‘zbekiston AQSHning savdo balansida ijobiy saldoga ega bo‘lgan kam sonli davlatlardan biri (213,9 million dollar). Bizning eng yirik eksportimiz qishloq xo‘jaligi uskunalari va yuk tashish furgonlaridir”.

Shuningdek, o‘tgan yili AQSh Mehnat Departamenti O‘zbekiston paxtasiga majburiy mehnat sabab o‘rnatilgan taqiqni olib tashladi, bu esa yangi bozorlarga chiqish imkoniyatini beradi. O‘zbekiston Amerika to‘qimachilik kiyim-kechak kompaniyalari, xususan, Hindistonda ishlab chiqariladigan brendlar uchun yetkazib berish zanjirida muhim rol o‘ynashi mumkin.

“Joriy yilda mamlakatda 2022-2026-yillarni o‘z ichiga olgan Yangi O‘zbekistonni rivojlantirish strategiyasi qabul qilindi. Prezident devoni rahbari Sardor Umurzoqov Yangi strategiyaning asosiy ustuvor yo‘nalishlaridan biri O‘zbekistonning JSTga a’zo bo‘lishi ekanini ta’kidlagan”, – deyiladi maqola so‘ngida.

• AQSh
• Mirziyoyev
• O‘zbekiston
• Prezident
• Tashqi savdo