Oʻzbekiston Osiyoda birinchilardan boʻlib ayollar jamoalarini ham litsenziyalashdan oʻtkazishni yoʻlga qoʻydi.

Xususan, ortda qolgan 2021-yilda Osiyoda ilk bora ayollar jamoalari ham sinov tariqasida litsenziyalashdan oʻtkazildi. Bu haqda OʻzPFL xabar berdi.

Qayd etilishicha, OʻzPFL OFKning qitʼada ayollar futbolini rivojlantirish boʻyicha qilinayotgan mazkur tashabbusini qoʻllab-quvvatlagan va OFKning soʻroviga ijobiy javob bergan holda, kam sonli mamlakatlar qatorida Oʻzbekiston ayollar Oliy ligasi jamoalari ilk bora litsenziyalashga ariza topshirishgan.

Bunda 11 ta klub – Oliy liganing 10 ta ishtirokchisi va koʻngilli tarzda Birinchi liganing “Dinamo-W” jamoasi OFKning onlayn platformasi – AFC CLASga 5 asosiy tamoyil: sport, infratuzilma, ishchi-xodimlar, huquqiy, moliyaviy mezon boʻyicha zarur hujjatlar toʻplamlarini yuklab borishdi.

Yakunda, 2 ta klub – Jizzaxning “Soʻgʻdiyona-W” hamda Toshkentning “Bunyodkor-W” jamoalari OFK litsenziyasini qoʻlga kiritishdi.

Maʼlum qilinishicha, qitʼa futbol uyushmasining rejasiga koʻra, 2022-yildan eʼtiboran ayollar jamoalarini litsenziyalash jarayoni barcha qolgan aʼzo davlatlarda ham qatʼiy tatbiq etiladi.

Boisi 2023-yildan boshlab ayollar jamoalari oʻrtasida toʻlaqonli Osiyo Chempionlar ligasi tashkil qilinishi rejalashtirilmoqda va ushbu musobaqada kelasi yildan faqat litsenziya oladigan klublargina ishtirok etadi.

• Futbol
• Xorij