Pekin shahrida XXIV qishki Olimpiya oʻyinlari oʻz yakuniga yetib bormoqda. Bugun unda ishtirok etgan Oʻzbekiston delegatsiyasining chiqishi nihoyasiga yetdi.

Bu Olimpiadada Oʻzbekiston sharafini togʻ changʻichimiz Komiljon Toʻxtayev himoya qildi. Komiljon unda gigant slalom va slalom dasturlarida ishtirok etdi. Aytish mumkinki, gigant slalom hamyurtimiz uchun omadli keldi.

87 sportchi start olgan ushbu dasturda sportchimiz 29-natijani qayd etdi. 46 changʻichi esa finishga kela olmadi. Bu uning uchun nafaqat faoliyatidagi, balki Osiyo va MDH vakillari orasidagi eng yuqori koʻrsatkichdir. Shuningdek, bu qishki Olimpiadalarda gigant slalom dasturida hamyurtlarimiz qayd etgan eng yaxshi natija sifatida tarixga kirdi.

Oʻz navbatida, texnik jihatdan juda murakkab hisoblangan slalom dasturi vakilimiz uchun omadsiz yakunlandi. Finishga bir necha metrlar qolganida Toʻxtayev darvozalardan oʻtishda xatoga yoʻl qoʻydi va diskvalifikatsiya qilindi. Shunday boʻlsa ham, bu Olimpiada orqali Komiljon kelgusi faoliyati uchun ulkan tajriba toʻpladi.

• O‘zbekiston
• Qishki Olimpiada