Oʻzbekiston Iqtisodiy Hamkorlik Tashkiloti mamlakatlari Turizm vazirlarining IV yigʻilishiga raislik qildi. Tadbir doirasida Shahrisabz shahri 2024-yil “IHT turizm poytaxti” deb eʼlon qilindi. Bu haqda Turizm va madaniy meros vazirligi axborot xizmati xabar berdi.

Qayd etilishicha, Iqtisodiy Hamkorlik Tashkilotiga aʼzo davlatlar Turizm vazirlarining IV yig‘ilishi onlayn formatda bo‘lib o‘tdi. Tadbir IHTda “2022 yil – o‘zaro aloqalarni mustahkamlash yili” konsepsiyasiga muvofiq O‘zbekiston raisligida o‘tkazilgan.

Yig‘ilishda tashkilotga aʼzo davlatlarning turizm idoralari rahbarlari va IHT Madaniyat Instituti prezidenti ishritok etdi. Tadbirga O‘zbekiston Respublikasi Bosh vaziri o‘rinbosari – Turizm va madaniy meros vaziri Аziz Аbduhakimov raislik qildi.

Qayd etish mumkin, Iqtisodiy Hamkorlik Tashkilotiga O‘zbekiston, Turkmaniston, Turkiya, Eron, Tojikiston, Pokiston, Qirg‘iziston, Qozog‘iston va Ozarbayjon mamlakatlari kiradi.

IV yig‘ilish kun tartibidan IHT mintaqasida COVID-19 pandemiyasidan keyin turizm sohasini jadal tiklash, xavfsiz va barqaror rivojlantirish bo‘yicha “Yo‘l xaritasi”, “IHT turizm poytaxti” nomzodlari, “ECO Vision 2025” mandatlari bo‘yicha amalga oshirilgan ishlar taqdimoti hamda IHTga aʼzo davlatlarning “Samarqand Deklaratsiyasi” o‘rin olgan.

“Аziz Аbduhakimov yig‘ilish ishtirokchilarini O‘zbekistonda turizm sohasida amalga oshirilayotgan islohotlar, joriy yil natijalari va davlat rahbari tomonidan kelgusi yilga qo‘yilgan aniq rejalar bilan tanishtirdi. Shuningdek, 450 millionga yaqin aholiga ega IHT hududi yirik turizm bozori ekanligi, ko‘p tomonlama hamkorlikni mustahkamlash orqali turistlar oqimini sezilarli darajada oshirishga doir takliflar ilgari surildi”, – deyiladi xabarda.

Shu bilan birga, tashkilotga aʼzo davlatlar turizm sohasi rahbarlari 2023-yil Samarqand shahrida bo‘lib o‘tishi rejalashtirilgan UNWTO Bosh Аssambleyasining XXV-sessiyasi va uning doirasida amalga oshiriladigan tadbirlarda faol ishtirok etish uchun taklif qilingan.

• Madaniy meros
• Turizm