AQSH prezidenti Jo Bayden administratsiyasi Rossiya harbiy va mudofaa sanoatini qoʻllab-quvvatlaganligi uchun bir qator xorijiy kompaniyalarni, jumladan Oʻzbekistonda joylashgan korxonani ham “qora roʻyxat”ga kiritdi. Bu haqida VOA news xabar berdi

Qora roʻyxatga tushgan Oʻzbekistondagi kompaniya nomi Promcomplektlogistic MCHJ boʻlib, u Toshkent shahri, Navoiy koʻchasi 16a-uy manzilida joylashgan, Ochiq maʼlumotlarga koʻra, korxonaning 100 foiz ulushi fuqaro Oleg Grabilinga tegishli.

Grabilin MCHJni roʻyxatdan oʻtkazishda Rossiyaning GFK Logistics kompaniyasiga tegishli sayt domeniga ochilgan elektron pochtadan foydalangan. AQSH Moliya vazirligiga koʻra, ushbu firma texnologik vositalar sotadi. AQSH Davlat departamentining tasdiqlashicha, Promcomplektlogistic shu yilning 3-martida sanksiya qoʻllanilgan Rossiyaning “Radioavtomatika” kompaniyasi bilan ishlashda davom etmoqda. Ularga mikrochiplar yetkazib bermoqda. “Radioavtomatika” Rossiya mudofaa sanoati taʼminotchisi sanaladi.

AQSH Savdo vazirligining fikricha, ushbu kompaniyalar “sanksiyalar ostida qolgan Rossiya tashkilotlari bilan tovarlar yetkazib berish boʻyicha shartnomalar tuzishda davom etishmoqda”.

Qora roʻyxatga kirganlar orasida Oʻzbekistondan tashqari Rossiya, Xitoy, Litva, Pokiston, Singapur, BAA, Buyuk Britaniya va Vyetnamda joylashgan korxonalar ham bor.

• AQSh
• Sanksiya