Bugun, 6-dekabr kuni Bahrayn mamlakati mezbonlik qilayotgan yoshlar oʻrtasidagi Paraosiyo oʻyinlarining soʻnggi kunida Oʻzbekiston terma jamoasi vakillari 2 ta oltin medalga ega chiqishdi.

Jumladan, para suzishning “S 8” klassida 100 metrga chalqancha usulda suzish boʻyicha erkaklar oʻrtasida Azizbek Boynazarov 1 daqiqa 21:39 soniya natija bilan marraga birinchi boʻlib yetib keldi va oltin medalga sazovor boʻldi.

Shuningdek, para pauerlifting boʻyicha erkaklar oʻrtasida 65 kg. vazn toifasida Sherali Ahmedov 138 kg. toshni oʻziga boʻysundirdi va oltin medalni qoʻlga kiritdi.

Eslatib oʻtish mumkin, suzuvchi Azizbek Boynazarov musobaqa davomida 3 ta oltin va bitta bronza medalini qoʻlga kiritdi.

Maʼlumot uchun, Oʻzbekiston delegatsiyasi yoshlar oʻrtasidagi Paraosiyo oʻyinlarini 11 ta oltin, 2 ta kumush va 5 ta bronza, jami 18 ta medal bilan yakunlashga muvaffaq boʻldi.

• O‘zbekiston
• Paralimpiya