2024-yilning o‘tgan o‘n bir oyi yakuniga ko‘ra, Qozog‘iston O‘zbekistonning uch asosiy savdo hamkorlaridan biri bo‘lgan.

O‘zbekiston Respublikasi Statistika agentligi ma’lumotiga ko‘ra, 2024-yil yanvar-noyabr oylarida mamlakatimiz tashqi savdosi qiymati 59,4 milliard dollarni tashkil etib, o‘tgan yilning shu davriga nisbatan 3,6 foiz o‘sgan.

Qayd etilishicha, bugungi kunda O‘zbekiston 195 davlat bilan iqtisodiy aloqalarni yo‘lga qo‘ygan. Savdo aylanmasi bo‘yicha Xitoy (19 foiz), Rossiya (18 foiz), Qozog‘iston (6,5 foiz), Turkiya (4,4 foiz) va Koreya Respublikasi (3 foiz) yetakchilik qilmoqda.

Xususan, Qozog‘istonga 1,3 milliard dollarlik mahsulot eksport qilingan, ushbu davlatdan import miqdori esa 2,5 milliard dollarga teng.

Mutaxassislar fikriga ko‘ra, Qozog‘iston O‘zbekistonning yirik tashqi iqtisodiy hamkorlaridan biriga aylanishi umumiy chegara mavjudligi bilan bog‘liq. Shuningdek, MDH erkin savdo zonasi hamda o‘zaro iqtisodiy munosabatlar liberallashuvi ham bu boradagi ijobiy o‘sishni ta’minlamoqda.

• Hamkorlik
• O‘zbekiston
• Qozog‘iston
• Tashqi savdo