Endilikda O‘zbekiston yo‘llarida baland shovqin chiqaradigan avtomobillarni aniqlash imkonini beruvchi maxsus radarlar o‘rnatilishi mumkin. Bu haqida Adliya vazirligi Axborot xizmati ma’lum qildi.
Qayd etilishicha, hozirda O‘zbekistonda zararli shovqin ta’siriga qarshi kurashish masalalarini tartibga soluvchi yagona normativ-huquqiy hujjat mavjud emas.
Adliya Vazirligi ayni paytda «tungi vaqt» bo‘yicha yagona tushuncha mavjud emasligi, ushbu vaqt Mehnat kodeksining 122-moddasiga muvofiq – soat 22:00 dan 06:00 gacha, Ma’muriy javobgarlik to‘g‘risidagi kodeksning 192-moddasiga muvofiq – 23:00 dan 06:00 gacha, «Turar joy binolarida, jamoat binolari va uy- joy qurilishi hududlarida ruxsat etiladigan shovqin me’yorlaridan oshmasligini ta’minlashga qo‘yiladigan sanitariya qoidalari va normalari»ga (SanPiN 0267-09-son) muvofiq esa – 23:00 dan 07:00 gacha deb belgilanganini eslatar ekan, bu borada rivojlangan davlatlar, jumladan, Yaponiyada 1968-yilgi «Shovqinni tartibga solish to‘g‘risida», AQSHda 1972-yilgi «Shovqinni nazorat qilish to‘g‘risida», Buyuk Britaniyada 1996-yilgi «Shovqin to‘g‘risida» qonunlarini namuna qilib ko‘rsatgan.
Vazirlik nazarda tutayotgan mazkur tizim shovqin darajasi kuchli bo‘lgan avtomashinani tanib olish, avtomatik ravishda suratga olish va uning raqamini o‘qish qobiliyatiga ega shovqin radarlari orqali avtotransport egasiga jarima to‘lash zarurligi haqida xatni avtomatik ravishda yuboradi.
“Ushbu tashabbuslarning imkon qadar tezkorlik bilan amalga oshirilishi jamiyat hayotini yaxshilash, shovqinning salbiy ta’siriga barham berish, shuningdek, zararli mehnat sharoitlariga ega ishchilar hamda shovqin ta’siri mavjud noqulay hududlarda yashovchi aholi uchun adolatli kompensasiya to‘lovlari joriy etilishiga xizmat qiladi”, – deyiladi vazirlik xabarida.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!