“Vajnie istorii” nashri bu haqda Yagona tibbiy axborot-tahliliy tizimdan (EMIAS) olingan ma’lumotlarga tayanib xabar bermoqda.

Jurnalistik surishtiruvga ko‘ra, birgina Moskvada 2023-yil aprelidan 2024-yil mayigacha bo‘lgan davrda Rossiya armiyasiga 1500 dan ortiq xorijiy yollanma jangchilar jalb qilingan. Ularning barchasi yashash manzili sifatida Yablochkova ko‘chasi, 5-uydagi yagona saralash punktining manzilini ko‘rsatgan.

Jurnalistlar bu davr mobaynida Moskvadagi saralash punkti orqali ro‘yxatdan o‘tgan 1300 dan ortiq chet ellikning kelib chiqish davlatini aniqladi. Ko‘pchilik yollanma askarlar Janubiy va Sharqiy Osiyo mamlakatlaridan (771 kishi). Ikkinchi va uchinchi o‘rinlarda sobiq Sovet Ittifoqi mamlakatlari (523 kishi) va Afrika davlatlari (72 yollanma) turibdi.

Rossiyaga eng ko‘p yollanma jangchilar Nepal davlatidan borgan bo‘lib, ularning aniqlangani soni 603 kishini tashkil etgan. 2023-yil noyabr oyida Nepal hukumati Rossiyadan fuqarolarini armiyaga yollashni to‘xtatishni so‘ragan bo‘lsa-da, yollash baribir davom etgan.

Rossiya uchun urushga borayotganlar orasida Moskva tomonidan “do‘st bo‘lmagan” deb e’lon qilingan davlatlar fuqarolari ham bor. Jumladan, AQSh (2 kishi), Latviya (4), Fransiya (2), Italiya (2) va boshqa mamlakatlarning fuqarolari rus qo‘shinlari safida xizmat qilish uchun shartnoma imzolagan. Yevropa qit’asi davlatlari orasida eng ko‘p yollanma jangchi Serbiyadan bo‘lib, ularning soni 8 kishini tashkil etgan. Serbiya Rossiyaga “do‘st” sifatida qaraladi.

Yana 71 nafar yollanma askar Yaqin Sharq davlatlaridan kelgan bo‘lib, Misr (31), Eron (7), Jazoir (7), Iroq (2), Suriya (1), Turkiya (1) va boshqalar shu jumlasidan.

Afrikaning ishsizlik va qashshoqlik yuqori bo‘lgan davlatlaridan 72 nafar odam urushga jalb qilingan. Bu mintaqada Gana (26), Kamerun (10) va Senegal (8) davlatlari yetakchilik qilmoqda.

“Vajnie istorii”ning xabar berishicha, Yablochkova 5-uy manzilida ro‘yxatdan o‘tgan o‘nlab xorijliklar Ukrainadagi urushda qatnashganini tasdiqlagan. Ulardan ayrimlari halok bo‘lgan yoki Ukraina asirligiga tushgan, boshqalari esa shartnoma muddatini o‘tab, Rossiya armiyasi saflaridan chiqib ketishga muvaffaq bo‘lgan.

Jurnalistlarga ko‘ra, Moskvadagi saralash punktiga kelganlarning hammasi ham xizmatga kirishmagan — kamida 13 nafar chet ellik ko‘ngilli Rossiyani zudlik bilan yoki bir necha kundan so‘ng tark etgan.

• Rossiya
• Ukraina
• Urush
• Xorij
• askar