Prezident “2022-2024 yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida”gi qarorni imzoladi. Bu haqida Adliya vazirligi axborot xizmati xabar berdi.

Ma’lum qilinishicha, qaror bilan 2022-2024 yillarda O‘zbekistonning ijtimoiy va ishlab chiqarish infratuzilmasini rivojlantirish dasturi qabul qilingan.

Ta’kidlanishicha, dastur doirasida belgilangan yillarda ijtimoiy va ishlab chiqarish infratuzilmasini rivojlantirish uchun jami 76 ming 881 milliard so‘m ajratiladi. Shunga ko‘ra, mazkur yillarda, jumladan, quyidagi ijtimoiy va ishlab chiqarish obyektlarini ishga tushirish nazarda tutilgan:

- 54 230 o‘quv o‘rni va 8358 ta yotoq o‘rniga ega oliy ta’lim muassasalari;
- 259 101 o‘quv o‘rniga ega, 248 ta sport zaldan iborat umumta’lim, ijod va ixtisoslashtirilgan maktablar;
- 88 310 o‘ringa ega maktabgacha ta’lim tashkilotlari;
- 24 213 o‘ringa ega sog‘liqni saqlash muassasalari.

Ma’lum qilinishicha, qaror bilan ijtimoiy va ishlab chiqarish infratuzilmasini rivojlantirish bo‘yicha Respublika komissiyasi tuzilgan bo‘lib, komissiya dasturda ishtirok etayotgan vazirlik, idora, xo‘jalik birlashmalari va mahalliy hokimliklar faoliyatini muvofiqlashtirib boradi.

Qayd etilishicha, dasturlar doirasida rejalashtirilgan mablag‘ni ichki manbalar hisobidan jalb qilingan qarz mablag‘lari, xorijiy kreditlar va ular bo‘yicha hisoblangan foiz to‘lovini qoplashga, shuningdek, obyektlar qurish uchun kreditlar ajratishga yo‘naltirish taqiqlanadi. Qarorga ko‘ra, 2022-yildan:

- ikki yil muddatga vazirliklar, idoralar va mahalliy hokimliklarning ma’muriy binosini qurish va rekonstruksiya qilish bo‘yicha yangidan boshlanadigan loyihalarni (Prezident qaroriga muvofiq amalga oshiriladigan, shuningdek, yangidan tashkil etiladigan shahar va tumanlarda joylashadigan loyihalar bundan mustasno) mamlakatning ijtimoiy va ishlab chiqarish infratuzilmasini rivojlantirish dasturlariga kiritish taqiqlanadi;

- kelgusi yillar uchun ijtimoiy va ishlab chiqarish infratuzilmasini rivojlantirish dasturlarini shakllantirish jarayonida keyingi yillarga o‘tadigan loyihalar (obyektlar) soni bosqichma-bosqich qisqartiriladi va ularni tegishli moliyaviy yilda foydalanishga topshirish nazarda tutiladi.
2022-yilda yakunlanadigan ta’lim muassasalari obyektlari 15-avgustgacha, sog‘liqni saqlash va tibbiy-ijtimoiy muassasalar obyektlari 1-oktyabrgacha, irrigatsiya va melioratsiya tizimlari obyektlari 1-dekabrgacha foydalanishga topshiriladi.

• Prezident
• Qaror
• Talabalar