Ayni damda Prezident raisligida sanoat kooperatsiyasini rivojlantirish va ishlab chiqarishni mahalliylashtirish chora-tadbirlari yuzasidan videoselektor yig‘ilishi bo‘lib o‘tmoqda.

Qayd etilishicha, yig‘ilishda sanoat tarmoqlari, yirik korxonalar bilan mahalliy ishlab chiqaruvchilar o‘rtasida “mahsulotbay” kooperatsiyani yo‘lga qo‘yish zarurligi aytib o‘tilgan. 

Shuningdek, bu borada Navoiy kombinati birinchi qadamlarni qo‘yayotgani ta’kidlangan.

Kombinat import mahsulotlar va ularga texnik talablar haqidagi ma’lumotlarni “kooperatsiya portali”ga joylashtirgani hisobiga, oldin import qilingan 600 mlrd so‘mlik mahsulotlar 18 ta mahalliy korxona tomonidan ishlab chiqarilmoqda.

Eng muhimi, ushbu 18 ta korxona so‘nggi 3 yilda kichik korxonadan o‘rta ishlab chiqaruvchilar toifasiga o‘tib, ish o‘rinlarini 10 baravarga oshirgan.

Ushbu tajribani barcha tarmoq va hududlar yo‘lga qo‘yishi kerakligi ko‘rsatib o‘tildi.

Xususan, bu borada 2022-yil uchun 4,4 trln so‘mlik kooperatsiya shartnomalari tuzish rejalari mutlaqo qoniqarsiz ekanligi ta’kidlangan. Bunii 15 trln. so‘mga yetkazish bo‘yicha barcha imkoniyatlar mavjud.

Shuning boisdan, joriy yil 1-iyulga qadar jami 283 turdagi import qilinayotgan mahsulotlarni mahalliylashtirish bo‘yicha tayyor biznes-rejalarni tadbirkorlarga taklif etish vazifasi qo‘yildi.

• Prezident
• Shavkat Mirziyoyev
• Videoselektor
• mahsulotbay