10-fevral kuni Toshkent viloyatida Markaziy Osiyo atrof-muhit va iqlim o‘zgarishini o‘rganish universiteti (“Green University”)ning ochilish marosimi bo‘lib o‘tdi. Bu haqda Ekologiya va atrof muhitni muhofaza qilish va iqlim o‘zgarishi vazirligi xabar berdi.

Qayd etilishicha, universitet Prezidentning 2023-yil 31-maydagi “Ekologiya va atrof-muhitni muhofaza qilish sohasini transformatsiya qilish va vakolatli davlat organi faoliyatini tashkil etish chora-tadbirlari to‘g‘risida”gi qarori asosida tashkil etilgan.

Universitetning to‘liq nomi “Central Asian Green University” bo‘lib, u biologik xilma-xillikning yo‘qolishi, iqlim o‘zgarishi va ifloslanishning uch karra sayyoraviy inqirozini hal qilishda yordam beradi.

Ushbu oliygohni ochishdan maqsad mahalliy, mintaqaviy va global ekologik muammolarni samarali boshqarish, ekologiya va atrof-muhitni muhofaza qilish sohasida mintaqaviy hamkorlikni mustahkamlash, ilmiy va intellektual salohiyatni amalga oshirishda innovatsion g‘oyalar, amaliyot va texnologiyalarni joriy etishdir.

Shuningdek, universitet davlat oliy ta’lim muassasasi bo‘lib, “Hub and Spoke” tamoyili asosida faoliyat olib boradi.

Ma’lumot uchun, hozirda hamkorlik uchun Buyuk Britaniya, Yangi Zelandiya, AQSh va boshqa davlatlarning xalqaro universitetlaridan professorlar universitetga faol jalb etilmoqda.

• Ekologiya
• Hamkorlik
• Universitet