O‘zbekistonda meva-sabzavotchilik bilan shug‘ullanuvchilarga imtiyozli kreditlar berish tartibi belgilandi. Bu haqida Adliya vazirligininng Huquqiy axborot kanali xabar berdi.

Ma’lum qilinishicha, Prezidentning 15-dekabrdagi “Meva-sabzavotchilik sohasini davlat tomonidan qo‘llab-quvvatlash, tarmoqda klaster va kooperasiya tizimini yanada rivojlantirish chora-tadbirlari to‘g‘risida”gi qarori qabul qilingan.

Qarorga ko‘ra, 2022-yil 1-yanvardan fermer, dehqon xo‘jaliklari va boshqa mahsulot yetishtiruvchilarga — meva, uzum, sabzavot, kartoshka, poliz ekinlari, ko‘katlar va dorivor o‘simliklar, dukkakli va moyli ekinlarni yetishtirish uchun hosil qiymatining 50 foizigacha yillik 14 foiz stavkada 6 oylik imtiyozli davr bilan 12 oy muddatga kredit ajratiladi.

Shuningdek, meva-sabzavotlarni qayta ishlovchi, saqlovchi va eksport qiluvchilarga — yetishtirilgan qishloq xo‘jaligi mahsulotlarini xarid qilishga talab etiladigan aylanma mablag‘larni to‘ldirish uchun yillik 14 foiz stavkada 12 oylik “revolver” kredit beriladi.

Qayd etilishicha, mazkur tadbirlarni moliyalashtirish uchun jamg‘armaga 2 trillion so‘m byudjet ssudasi ajratiladi. Shu bilan birga, 2022-yil 1-martdan meva-sabzavotchilik klasterlari (kooperasiyalar) va fermer xo‘jaliklariga — eksport shartnomasi mavjud bo‘lib, meva-sabzavot hosilini xavf-xatardan sug‘urtalash xizmatidan foydalanganda to‘langan sug‘urta mukofotining 50 foizi qoplab beriladi. Bunda qoplab beriladigan mablag‘ sug‘urta pulining 1 foizdan ortiq bo‘lmasligi kerak.

Bundan tashqari, meva-sabzavotchilik klasterlariga (kooperatsiyalarga) — xorijdan malakali agronom, entomolog, laboratoriya mutaxassislarini jalb qilish xarajatlarining 50 foizi Qishloq xo‘jaligi vazirligining tuman bo‘limlari orqali kompensatsiya qilinadi. Bunda xarajatlar bir oyga 1 nafar mutaxassis uchun ming dollar ekvivalentidan oshmasligi lozim.

• Meva
• qishloq_xo‘jaligi