2022-yil yanvar – sentyabr oylarida O‘zbekistondagi o‘rtacha oylik ish haqi 3,72 mln so‘mni tashkil etib, 2021-yilning mos davriga nisbatan 24,9 foizga o‘sgan. Bu haqda Davlat statistika qo‘mitasi ma’lum qildi.

Unda qayd etilishicha, eng kam oylik ish haqi ikki barobarga – jami 23,1 foizga oshirilib, hozirda 920 ming so‘mni tashkil etmoqda.

2022-yil yanvar – sentyabr oylari uchun o‘rtacha oylik ish haqi ko‘rsatkichini shakllantirishda qishloq xo‘jaligi va kichik tadbirkorlik sub’yektlari hisobga olinmagan, chunki ular yilda bir marta hisobot taqdim etishi belgilangan.

Tarmoqlar bo‘yicha eng yuqori maoshlar bank, moliya va sug‘urta sohalarida bo‘lib, 9,73 mln so‘mni tashkil etgan. Ikkinchi o‘rinni 6,97 mln so‘m bilan axborot va aloqa sohasi egallagan bo‘lsa, uchinchi o‘rinda 4,85 mln so‘m bilan tashish va saqlash sohasi qayd etiligan.

Sohalar doirasida ajratilgan faoliyat turlari orasida dasturlash 10,4 mln so‘m bilan yetakchilik qilmoqda.

Eng kam daromad sog‘liqni saqlash, ijtimoiy xizmatlar (2,51 mln so‘m) va ta’lim (2,59 mln so‘m) sohalarida hisoblanadi.

• Daromad
• Davstatqo‘m
• O‘zbekiston