O‘zbekiston Soliq kodeksiga o‘zgartish va qo‘shimchalar kiritildi. Bu haqida Davlat soliq qo‘mitasi matbuot xizmati xabar berdi.

Qayd etilishicha, o‘zgartish va qo‘shimchalarning asosiy yo‘nalishlaridan biri tadbirkorlik muhitini yanada yaxshilash va yoshlarni qo‘llab-quvvatlashdan iborat.

Jumladan, asosiy vositalarga investitsiyalar kiritilishini rag‘batlantirish maqsadida, foyda solig‘i bazasidan chegiriladigan ayrim xarajatlar miqdori oshirilmoqda. Jumladan, amortizatsiya ajratmalari normalari — o‘rtacha 2 barobarga. Xususan:

- binolar uchun 3 foizdan 5 foizga;

- inshootlar — 5 foizdan 10 foizga;

- quvurlar, elektr uzatish liniyalari va telekommunikatsiyalar — 8 foizdan 15 foizga;

- mashinalar va asbob-uskunalar — 15 foizdan 20 foizga;

- kompyuter va periferiya uskunalari — 20 % foizdan 40 foizga.

Shuningdek, bir martalik investitsiyaviy chegirma miqdori — 2 barobarga. Xususan:

- yangi texnologik uskunalar uchun 10 foizdan 20 foizga;

- ishlab chiqarishni kengaytirish bo‘yicha yangi qurilish — 5 foizdan 10 foizga.

Faoliyat natijasida ko‘rilgan va kelgusi davrga o‘tkaziladigan zararlarning cheklangan miqdori joriy soliq davri soliq bazasining 60 foizidan 100 foizigacha oshirilmoqda.

Mahalliy va xorijiy investorlarga teng shart-sharoitlar yaratish maqsadida, respublikada doimiy muassasa orqali faoliyat yuritadigan norezidentlar tomonidan foyda solig‘i bilan birga, sof foydadan dividend solig‘i (10 foiz) to‘lash tartibi joriy etilmoqda.

Tadbirkorlarga ular umumiy maydoni 1000 kvadrat metrdan (10 sotixdan) ortiq bo‘lgan yer uchastkalariga va (yoki) bino (inshoot)larga mulk huquqini qo‘lga kiritganda mol-mulk va yer solig‘i bo‘yicha to‘lovlarni 6 oyga kechiktirish huquqi berilmoqda.

Bunda, soliqlarni to‘lashni kechiktirishdan foydalanganlik uchun foiz soliqlar kechiktirilgan sanadan boshlab Markaziy bank asosiy stavkasining 50 foizi (7 foiz) miqdorida hisoblanadi.

Soliq hisobotini belgilangan muddatlarda taqdim etmaganlik uchun moliyaviy sanksiyalar bekor qilinmoqda.

Quyidagilarga yo‘naltirgan mablag‘lar daromad solig‘idan ozod qilinmoqda:

-oliy va professional ta’lim muassasalarida o‘qish uchun tijorat banklaridan olingan ta’lim kreditlarini (foizlari bilan) qoplashga;

- yosh oila tomonidan olingan ipoteka kreditlarini va ular bo‘yicha hisoblangan foizlarni (15 mln so‘mgacha) qoplashga;

- xalqaro uyushmaga a’zolik badallari;

- qayta tayyorlash va malaka oshirish uchun nodavlat ta’lim tashkilotlariga yo‘naltiriladigan mablag‘lar;

- uy-joylarni talabalarga ijaraga berishdan olinadigan jismoniy shaxslar daromadi.

Bundan tashqari, 23 yoshgacha bo‘lgan yetim bolalar va ota-ona qaramog‘idan mahrum bo‘lgan bolalarga davlat tomonidan berilgan uy-joy jismoniy shaxslardan olinadigan mol-mulk solig‘idan ozod etilmoqda.

• Soliq