Koronavirusga qarshi emlangan fuqarolar o‘rtasida bosh sovrini avtomobil bo‘lgan yutuqli o‘yin tashkil etiladi. Qolaversa, SSV ish beruvchilardan 20-yanvarga qadar xodimlari koronavirusga qarshi emlanishini ta’minlashni so‘ragan.

2022-yilning 3 oyida emlanganlik sertifikatini olgan fuqarolar o‘rtasida qimmatbaho yutuqli o‘yin tashkil etiladi, deya xabar berdi SSV.

O‘yin yanvar, fevral va mart oylari davomida sertifikat olganlar o‘rtasida bo‘lib o‘tadi. Bosh sovrin – avtomobil.

SSVning xabar chiqqanidan keyin qo‘shimcha qilishicha, avvalroq vaksina olgan fuqarolar ham shu yilning fevral oyidan boshlab o‘tkaziladigan mazkur yutuqli o‘yinda ishtirok etishlari mumkin.
Shuningdek, SSV O‘zbekiston bosh davlat sanitariya vrachining 2021-yil 17-iyuldagi 11-son qarorida 18 yoshdan katta aholi qatlamini koronavirus infeksiyasiga qarshi emlash belgilangani, qolaversa, Mehnat kodeksining 113-moddasiga ko‘ra, xodim emlanishni rad etsa, ish beruvchi uni ishga qo‘ymaslikka haqli ekanligini eslatib o‘tgan.

Shu sababli SSV tashkilotlardan xodimlarning 2022-yil 20-yanvarga qadar koronavirusga qarshi emlanishini ta’minlashni hamda sababsiz emlanmaganlarni ishga qo‘ymaslik choralarini ko‘rishini so‘ragan.

Ta’kidlanishicha, 20 nafardan ortiq emlanuvchisi bor tashkilotlarga esa sayyor emlash brigadasini jalb etish imkoniyati ham yaratib beriladi va emlash bepul amalga oshiriladi.

Emlash masalalari bo‘yicha murojaat uchun Sanitariya-epidemiologik osoyishtalik va jamoat salomatligi xizmatining telefon raqami: 
78-888-01-01

• Avtomobil
• Vaksina