“Fuqarolarning raqamli pasporti” loyihasiga oid Hukumat qarori loyihasiga ko‘ra, mazkur yangi tartib evaziga aholidan muayyan faktlarni tasdiqlovchi hujjatlarni talab qilish amaliyoti bekor qilinishi mumkin.

Qayd etilishicha, ushbu yangilik muallifi AKT vazirligi bo‘lib, unda Toshkent shahrida 2022-yil 15-iyuldan 2023-yil 1-dekabrga qadar tajriba tariqasida “Elektron hukumat” tizimi foydalanuvchilarini identifikatsiyalashning yagona axborot tizimi negizida ayrim turdagi maʼlumot va hujjatlarni elektron ko‘rinishda taqdim etish imkoniyatini beruvchi “OneID mobile” mobil ilovasini yaratishni ko‘zda tutuvchi “Fuqaroning raqamli mobil pasporti” loyihasini joriy qilish nazarda tutiladi.

Hujjat loyihasida belgilanishicha, Toshkent shahrida 2022-yil 15-iyuldan boshlab:

– Pasport maʼlumotlari;

– Haydovchilik guvohnomasi maʼlumotlari;

– Avtotransport vositasini ro‘yxatdan o‘tkazganlik to‘g‘risida guvohnoma;

– Oliy maʼlumot to‘g‘risidagi diplom va talaba to‘g‘risidagi maʼlumotlari;

– Jismoniy shaxs tomonidan umumiy taʼlim muassasasini (11-sinf negizida) tamomlaganligi to‘g‘risida maʼlumot;

– Koronavirusga qarshi emlanganlik holati to‘g‘risidagi maʼlumot;

– Kadastr pasporti haqida maʼlumot;

– Tug‘ilganlik va nikoh qayd etilganlik haqidagi dalolatnoma maʼlumotlari Mobil ilova orqali elektron ko‘rinishda taqdim etiladi va ular qog‘oz hujjatga tenglashtiriladi. Yaʼni qog‘oz hujjatlar bilan bir xil yuridik kuchga ega bo‘ladi.

Mobil ilova orqali taqdim etiladigan alohida turdagi maʼlumot va hujjatlar ushbu mobil ilovada shakllantiriladigan QR-kod orqali tekshiriladi.

O‘zbekiston fuqaroligini tasdiqlovchi hujjati (pasporti yoki O‘zbekiston Respublikasi fuqarosining identifikatsiya kartasi) bo‘lgan 16 yoshga to‘lgan shaxslar elektron hujjatlardan mobil ilova orqali foydalanish huquqiga ega.

Mobil ilovadan foydalanishda mobil trafik uchun to‘lov undirilmaydi.

2023-yil 15-dekabrga qadar ushbu loyiha tajriba natijalari asosida boshqa sohalarda hamda respublikaning barcha hududlarida tatbiq etiladi.

O‘z navbatida davlat va tijorat xizmatlarini ko‘rsatish doirasida maʼmuriy tartib-taomillarni amalga oshirishda jismoniy shaxslardan Mobil ilova orqali taqdim etilgan ayrim turdagi maʼlumot va hujjatlarning asl nusxalariga tengligini isbotlashni talab qilish taqiqlanadi.

Eslatib o‘tamiz, o‘zbekistonliklarga 2011-yildan boshlab amaldagi biometrik pasport berila boshlagan bo‘lsa, 2021-yil 1-yanvardan boshlab O‘zbekiston fuqarolariga, fuqaroligi bo‘lmagan shaxslarga va O‘zbekiston hududida doimiy yashaydigan chet el fuqarolariga biometrik pasport o‘rniga 10 yil muddatga ID-karta beriladigan bo‘ldi.

• Hukumat
• Ma'lumotnoma
• Pasport
• Toshkent
• Yangilik