Tesla direktorlar kengashi raisi Robin Denholmning aksiyadorlarga yo‘llagan maktubida aytilishicha, agar aksiyadorlar Ilon Maskka mukofot sifatida trillion dollar to‘lashga rozi bo‘lmasa, u Tesla bosh direktori lavozimini tark etishi mumkin.

Sentyabr oyi boshida ma’lum bo‘lishicha, direktorlar kengashi Maskka bir trillion dollarlik “mukofot paketi”ni taklif qilmoqchi, biroq bu kompaniya bir nechta maqsadlarga erishishi sharti bilan amalga oshiriladi. Rejaga ko‘ra, Mask Tesla rahbari lavozimidagi faoliyati uchun maosh va bonuslar olmaydi. Buning o‘rniga u bosqichma-bosqich kompaniya aksiyalarini oladi, ularning ulushi belgilangan maqsadlarga erishilgan sari oshib boradi.

Denholm aksiyadorlarga yo‘llagan maktubida Tesla “burilish nuqtasida” ekanligini va Maskka mukofotni ma’qullashdan bosh tortish uning kompaniyani tark etishiga olib kelishi mumkinligini ta’kidladi. Uning fikricha, Maskning boshqaruvi Tesla muvaffaqiyati uchun “hal qiluvchi ahamiyatga ega” bo‘lgan, biznesmenning o‘zi esa “kompaniya kelajagining kaliti” hisoblanadi.

“Ilonsiz Tesla o‘z qiymatini sezilarli darajada yo‘qotishi mumkin, chunki kompaniyamiz biz intilayotgan maqsadlar uchun qadrlanmay qolishi ehtimoldan holi emas”, – degan Denholm.

Maskka beriladigan mukofot puli masalasida aksiyadorlarning ovoz berishi 5-noyabrgacha o‘tkazilishi rejalashtirilgan.

• Ilon_Mask
• Mukofot
• Tesla
• reja