O‘zbekistonda 2026-yil 1-yanvardan e’tiboran “A1” toifadagi haydovchilik guvohnomasi joriy etiladi. Bu haqda hukumat qarori qabul qilindi.

Qarorga ko‘ra, milliy haydovchilik guvohnomasining “A1” kichik toifasi – moped va skuterlarni, shuningdek, eng yuqori konstruktiv tezligi soatiga 25 kilometrdan oshmaydigan, ish hajmi 25 sm3 gacha bo‘lgan ichki yonuv dvigateliga ega bo‘lgan yoki nominal (belgilangan) quvvati 0,25 kilovattgacha bo‘lgan kichik hajmdagi mototransport vositalarini (individual harakatlanish vositalari bundan mustasno) boshqarish huquqini beradi.

“A1” toifadagi haydovchilik guvohnomasini olish uchun avtomaktabda o‘qish shart bo‘lmaydi. Nazariy va amaliy imtihonlarni topshirish uchun talabgorlardan o‘qishni tugatgani haqida guvohnoma talab etilmaydi. Ular o‘z ixtiyoriga ko‘ra o‘quv kurslarida (onlayn yoki oflayn shaklda) o‘qishi yoki mustaqil tayyorlanishi mumkin bo‘ladi.

Bunda, nazariy imtihonda 20 ta testdan kamida 16 tasiga to‘g‘ri javob bergan “A1” toifaga nomzodlar “nazariy imtihonni topshirgan” deb hisoblanadi va amaliy imtihonga qo‘yiladi.

1-yanvardan boshlab, shuningdek, “A”, “B”, “C”, “D” toifadagi haydovchilik guvohnomasiga ega shaxslar “A1” kichik toifadagi transport vositalarini boshqarish huquqiga ega bo‘ladi.

3 oy muddat ichida yo‘l harakati qoidalari, transportni boshqarish xavfsizligi va boshqa yo‘nalishlar bo‘yicha zarur bilim va ko‘nikmalarni shakllantirishga ko‘maklashuvchi elektron o‘quv materiallari ishlab chiqilishi lozim. Bu materiallar barcha foydalanuvchilar uchun ochiq bo‘ladi.

• Haydovchilik guvoxnomasi
• Imtihon
• Skuter
• prava