Prezidentining sud mustaqilligini kuchaytirish va sudyalar hamjamiyati organlari faoliyatini takomillashtirishga doir farmoni qabul qilindi. Hujjat “O‘zbekiston – 2030” strategiyasida belgilangan vazifalarni amalga oshirishga qaratilgan.

Farmonga ko‘ra:

Sudyalar hamjamiyati organlari faoliyatida sudyalarning o‘zini o‘zi boshqarish tamoyili va sud mustaqilligiga oid xalqaro standartlar joriy etiladi.

Sudyalik lavozimlariga nomzodlarni dastlab 5 yil muddatga, keyinchalik muddatsiz tayinlash tartibi belgilanadi.

Sud raislari va ularning o‘rinbosarlarini ochiq tanlov orqali tanlash tizimi yo‘lga qo‘yiladi.

Sudyaning “halollik”, “kasbiy layoqatlilik” va “odob qoidalariga rioya etish” mezonlari qonun darajasida belgilanishi ko‘zda tutiladi.

Kengash va Oliy sud tarkibini shakllantirish jarayonida sudyalar hamjamiyati organlari ishtiroki kengaytiriladi. Kengashning doimiy asosda faoliyat yurituvchi sudyalari Oliy sud, viloyat sudlari hamda tumanlararo va tuman sudlari sudyalari orasidan shakllantiriladi.

Sudyalar malaka hay’atlari va Sudyalar oliy malaka hay’ati tomonidan sudyalik lavozimlariga nomzodlar bo‘yicha xulosalar taqdim etish tartibi qonunchilikka kiritiladi. Kengash va Sudyalar oliy malaka hay’atining qo‘shma yig‘ilish tartibi bekor qilinadi.

Kengash raisiga intizomiy ishlarni qayta ko‘rib chiqish bo‘yicha taqdimnoma kiritish hamda Kengash tuzilmasi va shtat jadvalini mustaqil tasdiqlash vakolati beriladi.

2025-yil 15-dekabrdan boshlab Kengash rasmiy saytida bo‘sh lavozimlar va sudyalik lavozimlariga nomzodlarni tanlash jarayoniga oid ma’lumotlar ochiq e’lon qilib boriladi. Nomzodlarni tanlash va baholash jarayonini raqamlashtirish, shu jumladan sun’iy intellektdan foydalanish choralari belgilangan.

Kengashga qo‘shimcha 4 ta shtat birligi ajratiladi, umumiy shtat soni 32 tani tashkil etadi. Farmonda sud mustaqilligiga oid qonunchilikni xalqaro standartlar asosida qayta ko‘rib chiqish, sudyalarga nisbatan intizomiy jazo qo‘llash tartibini shaffoflashtirish bo‘yicha topshiriqlar berilgan.

Shuningdek, sud tizimida gender tenglikni ta’minlash maqsadida Odil sudlov akademiyasiga qabul jarayonida xotin-qizlar uchun kvota joriy etiladi. Ayol sudyalar assotsiatsiyasini tashkil etish tashabbusi ma’lumot uchun qabul qilingan.

Farmon ijrosini ta’minlash uchun mas’ul etib Sudyalar oliy kengashi raisi belgilangan, nazorat esa Prezident Administratsiyasi tomonidan amalga oshiriladi.

• Farmon
• Prezident
• Sud