Kuni kecha, 8-may sanasida Italiyaning Jesolo shahri mezbonlik qilgan para yengil atletika boʻyicha “Italian Open 2022” xalqaro Gran-Pri turniri yakuniga yetdi.

Musobaqaning soʻnggi kunida erkaklar oʻrtasida F36/37 klassida disk uloqtirish bahslarida ishtirok etgan Shaxboz Rajabboyev 41,35 metr natija bilan oltin medalni qoʻlga kiritgan boʻlsa, xuddi shu yoʻnalishda kumush medal ham hamyurtimiz Hayrullo Madaminovga nasib etdi. Madaminov 38,44 metr natija bilan 2-oʻrinni egalladi.

Bundan tashqari, erkaklar oʻrtasida F32/33 klassida yadro uloqtirish bahslarida ishtirok etgan vakilimiz Jasur Xoʻjayev 10,60 metr natija bilan kumush medalga sazovor boʻldi.

Erkaklar oʻrtasida T13 klassida uzunlikka sakrash yoʻnalishida Doniyor Ahmedov 5,95 metr natija qayd etdi va kumush medalni oʻziniki qildi.

Ayollar oʻrtasida T11 klassida 200 metrga yugurish bahslarida qatnashgan Asila Mirzayorova 28,07 soniya vaqt bilan kumush medalni qoʻlga kiritdi. Xuddi shu yoʻnalishda T12 klassida startga chiqqan hamyurtimiz Yoqutxon Xolbekova 29,73 soniya natija bilan bronza medaliga ega chiqdi.

Shuningdek, erkaklar oʻrtasida F46 klassida yadro uloqtirish bahslarida qatnashgan vakilimiz Musulmonqul Ahmedov 12,07 metr natija qayd etdi va bronza medali sohibi boʻldi.

Taʼkidlanishicha, Izzat Turgʻunov hamda Asila Mirzayorova oʻzlarining asosiy yoʻnalishi hisoblangan uzunlikka sakrashdan tashqari birinchi marta yugurish bahslarida ham ishtirok etdi va ijobiy natijalar koʻrsatdi.

Shu tariqa Oʻzbekiston delegatsiyasi “Italian Open 2022” xalqaro Gran-Prisini 17 ta medal bilan yakunladi. Shulardan 6 tasi oltin, 5 tasi kumush va 6 tasi bronza.

Oltin

Izzat Turgʻunov (2ta)

Mahliyo Akramova (1ta)

Doniyor Ahmedov (1ta)Yoqutxon Xolbekova (1ta)

Shaxboz Rajabboyev (1ta)

Kumush

Doniyor Ahmedov (2ta)

Hayrullo Madaminov (1ta)

Jasur Xoʻjayev (1ta)

Asila Mirzayorova (1ta)

Bronza

Jamoliddin Akobirov (2ta)

Asila Mirzayorova (2ta)

Yoqutxon Xolbekova (1ta)

Musulmonqul Ahmedov (1ta)