37°
Kechasi 24°
O‘zbekiston bo‘ylab 843 nafar odamni aldab, ularning 50,1 mlrd so‘m pulini o‘zlashtirgan guruh qo‘lga olindi. Ular avtomobillarni arzon kredit yoki lizingda yetkazib berishni va’da qilgan. IIV guruhdan jabrlanganlarni 102 qisqa raqamiga murojaat qilishlarini so‘radi.
O‘zbekiston Ichki ishlar vazirligi avtomobillarni arzon kredit yoki lizingda yetkazib berish bahonasida yuzlab fuqarolarni aldab, yirik firibgarlik jinoyatini amalga oshirgan guruh qo‘lga olinganini ma’lum qildi.
IIV ma’lumotlariga ko‘ra, “Umid avto companies”, “Umid Savdo Fayz Invest”, “Umid Avto Lizing”, “Umid Auto”, “Group Of Companies Ual”, “Umid Avto-Tashkent”, “Orient Auto”, “Umid Lizing Tashkent”, “Orient Avto-Lizing”, “Umid Auto Leasing”, “Group Of Orient Auto”, “Imkon Auto Xizmati”, “Umid Avto Companies”, “Busines Orientauto”, “Umid Auto Xizmati”, “Orient Auto Hamkor”, “Imkon Avto Markaz”, “Avtovariant”, “Ava Orientauto”, “Ava Umidavto”, “Avto Ijara Hizmati”, “Umid Auto Business Toshkent”, “Orient Auto Leasing”, “Orient Auto Toshkent”, “Ilgor Lizing” va “Orient Finans Lizing” MChJlar tashkil etilgan.
Ushbu kompaniyalar ijtimoiy tarmoqlardagi reklama orqali odamlarni 6−12 foizli past to‘lov sharoitida mashinalar olib berishga ishontirgan va Toshkent, Andijon, Namangan, Farg‘ona, Sirdaryo, Samarqand, Buxoro, Navoiy, Xorazm, Surxondaryo, Qashqadaryo viloyatlari hamda Nukus shahrida faoliyat yuritib, avans shartnomalari tuzgan holda pullarni o‘zlashtirgan.
Vazirlikka ko‘ra, ushbu guruhning jinoiy faoliyati oqibatida 843 nafar fuqaro jabrlangan, ularning umumiy zarari 50,1 milliard so‘mni tashkil etgan. Tergov doirasida ushbu kompaniyalarga tegishli 339 ta transport vositalariga xatlov qo‘yilgan.
IIV qo‘shimcha qilib, mazkur ish bo‘yicha 9 nafar shaxsga rasmiy ayblov e’lon qilinib, ularga nisbatan “qamoq” ehtiyot chorasi qo‘llanganini ma’lum qildi.
Ichki ishlar vaziri o‘rinbosari polkovnik Ramazon Ashropov rahbarligida maxsus tezkor shtab tuzilgan. U shtabda tegishli mutaxassislar jalb etilgan holda IIV Transport va turizm obyektlarida xavfsizlikni ta’minlash departamenti binosida har kuni soat 09:00 dan 21:00 ga qadar jabrlanuvchilar murojaatlari qabul qilinmoqda.
IIV suratdagi shaxslar yoki ularga aloqador kompaniyalar faoliyati haqida ma’lumoti bor yoki o‘zi shu yo‘l bilan jabrlangan fuqarolardan tezkor shtabga yoki 102 qisqa raqamiga murojaat qilishlarini so‘ramoqda.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
