Fransiya poytaxti Parij shahrida davom etayotgan yozgi Olimpiya o‘yinlarining ortda qolgan to‘qqizinchi kungi musobaqalari sarhisobiga ko‘ra, medallar jamg‘arish bo‘yicha Xitoy va AQSh poygasida okeanorti mamlakati vakillari chin yurti sportchilaridan o‘zib ketdi.

Kecha, 4-avgust kuni 13 ta sport turida qiziqarli va yodda qoladigan bahslar o‘tkazildi.

Jumladan, 37 yoshli serbiyalik tennischi Novak Jokovich Ispaniya vakili Karlos Alkarasni 7:6 (7:3), 7:6 (7:2) ko‘rinishida dog‘da qoldirib, oltin medalga ega chiqdi.

Shuningdek, ukrainalik Yaroslava Maguchix yengil atletika sport turining balandlikka sakrash dasturida oltin medalga sazovor bo‘ldi.

Ma’lumotlarga ko‘ra, Sena daryosi suvining pastlab ketishi oqibatida Olimpiya o‘yinlari dasturidagi triatlon musobaqalarining aralash jamoaviy bahslari bekor qilingan.

O‘zbekistonlik sportchilar ichida Hasanboy Do‘smatov va Lazizbek Mullajonovlar raqiblarini mag‘lub etib, finalga yo‘l oldi.

Yengil atletikachilar Anvar Anvarov va Safina Sa’dullayeva, velosportchi Olga Zabelinskayalar esa Olimpiadadagi o‘z ishtiroklarini medallarsiz yakunlaydigan bo‘ldi.

Parij-2024 o‘yinlarining o‘ninchi kungi musobaqalari ostonasida AQSh vakillari 19 ta oltin, 26 ta kumush, 26 ta bronza, jami 71 ta medal bilan yetakchilikka erishib olgan bo‘lsa, Xitoy vakillari 19 ta oltin, 15 ta kumush, 11 ta bronza, jami 45 ta medal bilan ikkinchi o‘rinda bormoqda. Umumjamoada 3-o‘rinni band etgan Fransiya olimpiyachilari hisobida 12 ta oltin, 14 ta kumush va 18 ta bronza medali mavjud.

Eslatib o‘tamiz, bugungacha Olimpiya o‘yinlarining sovrinli o‘rinlariga ega bo‘lgan mamlakatlar soni 71 taga yetdi.

• AQSh
• Boks
• Hasanboy Doʻsmatov
• Novak Jokovich
• Olimpiada
• Tennis
• Xitoy