Parijda o‘tayotgan yozgi Paralimpiya o‘yinlarining ortda qolgan uchinchi kungi musobaqalari o‘zbekistonlik paralimpiyachilar uchun omadli kechdi.

Delegatsiyamiz 5 ta oltin, 3 ta kumush, 3 ta bronza medali bilan umumjamoa hisobida 7-o‘ringa ko‘tarilib oldi. Paralimpiya o‘yinlariga mezbonlik qilayotgan Fransiya kecha 7-o‘rinni band etgandi. Endi esa 3 ta oltin, 6 ta kumush, 8 ta bronza medali bilan 8-o‘rinda bormoqda.

Xitoy paralimpiyachilari 20 ta oltin, 15 ta kumush, 7 ta bronza, jami 42 ta medal bilan peshqadamlik qilmoqda. 11 ta oltin, 8 ta kumush, 6 ta bronza medaliga ega Buyuk Britaniya ikkinchi, Braziliya delegatsiyasi 8 ta oltin, 3 ta kumush, 12 ta bronza medali bilan kuchli uchlikdan joy olgan.

Bugun, 1-sentyabr kuni Paralimpiya o‘yinlarining to‘rtinchi kungi bahslarida 15 ta sport turida bellashuvlar o‘tkazilsa, o‘zbekistonlik matonatli paralimpiyachilar para akademik eshkak eshish va para yengil atletika musobaqalarida ishtirok etadi.

Sportchilarimizdan Muhayyo Abdusattorova para akademik eshkak eshish dasturida o‘z omadini sinovdan o‘tkazadi. Para yengil atletika musobaqalarida esa Yoqutxon Xolbekova T12 dasturining uzunlikka sakrash bahslarida, Doniyor Ahmedov T13ning 100 metrga yugurish musobaqalarida ishtirok etadi.

• Paralimpiya