Armaniston ishtirok etayotgan tashqi xavfsizlik tizimlari samarasiz. Bu haqda Bosh vazir Nikol Pashinyan vatandoshlariga murojaatida aytib o‘tdi.

Pashinyan “so‘nggi yillarda Ozarbayjon va Armaniston o‘rtasida kechgan nizolarning yakuniy natijalaridan so‘ng” bu xulosaga kelgan. Bosh vazirning qo‘shimcha qilishicha, mamlakat ittifoqchilari o‘zining zaifligini ko‘rsatishga tobora ko‘proq harakat qilmoqda.

Pashinyan aynan qaysi “tashqi xavfsizlik tuzilmalari” va ittifoqchilari haqida gapirayotganini tushuntirmadi. Biroq Armaniston Kollektiv Xavfsizlik Shartnomasi Tashkilotining (KXShT) a'zosi bo'lib, bundan avvalgi chiqishlarida Pashinyan aynan shu tashkilot haqida juda ko‘p tanqidiy gaplar aytgan edi. Bugungi kunda ushbu tashkilotga Armanistondan tashqari yana Belarus, Qozog'iston, Qirg'iziston, Tojikiston va Rossiya ham a’zo.

Avvalroq Armaniston Tashqi ishlar vaziri Ararat Mirzoyan BMT missiyasini Tog‘li Qorabog‘da joylashtirishga chaqirgan edi.

• Armaniston
• KXShT
• Pashinyan