“Pokiston Senati bir ovozdan Hindiston shimolidagi Jammu va Kashmir hududida sodir etilgan teraktda Islomobodning rolini inkor qiluvchi rezolyutsiyani qabul qildi”, – deya xabar bermoqda Dawn.

“Pokiston o‘z nomini Pahalgam shahridagi hujum bilan asossiz bog‘lash bo‘yicha hech qanday urinishlarni tan olmaydi”, — deya hujjatdan parcha keltirgan portal.

Hujjatga ko‘ra, Senat Hindiston hukumatining “Pokistonni yomon ko‘rishga qaratilgan manipulyatsiya, insofsiz kampaniyasini” ham qoraladi. Islomobod “Dehli terrorizm masalasidan” o‘z manfaatlari yo‘lida foydalanmoqda, deb hisoblaydi.

Rezolyutsiyada, shuningdek, “Hind suvlari to‘g‘risidagi shartnomaning noqonuniy va bir tomonlama to‘xtatilishi ham qoralangan, bu shartnomani buzish hisoblanadi va urush harakati bilan tengdir”. Qarorda qayd etilishicha, Pokiston o‘z suvereniteti va hududiy yaxlitligini himoya qiladi.

Avvalroq Pokiston Mudofaa vaziri Xavaja Muhammad Asif Sky News telekanaliga bergan intervyusida “Agar keng ko‘lamli hujum yoki shunga o‘xshash narsa bo‘lsa, keyin to‘liq miqyosli urush shubhasiz sodir bo‘ladi”, – deb aytgan edi.

“Ikki yadroviy davlat o‘rtasidagi to‘qnashuv har doim tashvishga sabab bo‘ladi”, – degan Asif.

• Hindiston
• Pokiston
• Terakt