Kecha, 1-dekabr kuni Lodz shahrida (Polsha) Yevropada xavfsizlik va hamkorlik tashkiloti (YXHT) Tashqi ishlar vazirlari kengashining 29-yig‘ilishi bo‘lib o‘tdi.

Yig‘ilishda YXHT va unga qarashli tuzilmalar rahbarlari, tashkilotga a’zo davlatlarning tashqi ishlar vazirlari ishtirok etdi.

O‘zbekiston TIV rahbari o‘z nutqida tadbir ishtirokchilariga O‘zbekiston Prezidenti Shavkat Mirziyoyev rahbarligida barcha jabhalarida demokratik o‘zgarishlarni chuqurlashtirishga qaratilgan keng ko‘lamli va jadal islohotlar haqida ma’lumot berdi.

Qayd etilishicha, joriy yilda qabul qilingan 2022-2026-yillarga mo‘ljallangan Yangi O‘zbekistonni rivojlantirish strategiyasining maqsad va vazifalari YXHT tamoyillarini to‘la aks ettiradi.

O‘zbekiston inson huquqlari va qadr-qimmatini qat’iy himoya qilish, ommaviy axborot vositalarining ochiqligini, sud hokimiyati mustaqilligi va qonun ustuvorligini, diniy e’tiqod erkinligini ta’minlash, korrupsiyaga qarshi kurashish yo‘lida qat’iy ekani hamda YXHT bilan hamkorlikni kengaytirish va chuqurlashtirishga manfafatdorligi ta’kidlandi.

Norov mamlakatimizda boshlangan konstitutsiyaviy islohotlar jarayoni Yangi O‘zbekistonni rivojlantirishning uzoq muddatli strategiyasini amalga oshirish uchun mustahkam huquqiy asos yaratish va demokratik islohotlarning orqaga qaytmasligini ta’minlashga qaratilganini ta’kidladi.

Shuningdek O‘zbekiston Tashqi ishlar vaziri Yevropada xavfsizlik va hamkorlik tashkiloti Parlament assambleyasi (YXHT PA) raisi Margarita Sederfelt va Finlyandiya Respublikasi Tashqi ishlar vaziri Pekka Xaavisto bilan uchrashdi.

O‘zbekiston TIV rahbari M.Soderfeltni joriy yilning iyul oyida assambleya raisi lavozimiga qayta saylangani bilan tabrikladi.

O‘zbekiston Oliy Majlisi palatalari va YXHT PA o‘rtasidagi o‘zaro hamkorlikni kengaytirish masalalari muhokama qilindi.

Vladimir Norov YXHT Parlament Assambleyasi raisiga O‘zbekistonda amalga oshirilayotgan, jamiyat hayotining deyarli barcha jabhalarini qamrab olgan jadal va keng ko‘lamli demokratik islohotlar haqida ma’lumot berdi.

Qayd etilganidek, Yangi O‘zbekistonni rivojlantirish strategiyasining asosiy maqsadlaridan biri mamlakatimizda amalga oshirilayotgan islohotlarni izchil davom ettirishda Oliy Majlis palatalari va siyosiy partiyalarning rolini yanada oshirishdan iborat.

2023-yilda O‘zbekistonda YXHT PAning kuzgi sessiyasini o‘tkazish bilan bog‘liq tashkiliy masalalar yuzasidan fikr almashildi.

Uchrashuvda ayrim xalqaro va mintaqaviy masalalar ham ko‘rib chiqilgan.

Shuningdek, Finlyandiya Tashqi ishlar vaziri bilan siyosiy, savdo-iqtisodiy, madaniy-gumanitar va boshqa sohalardagi ikki tomonlama munosabatlarning bugungi holati va uni rivojlantirish istiqbollari muhokama qilindi.

Vazirlar iqtisodiy diplomatiyani faollashtirish muhimligini taʼkidladilar, “Finnpartnership” koʻmagida 2022-yil 1-noyabr kuni Toshkent shahrida Finlyandiyaning qator kompaniyalari ishtirokida “yashil” texnologiyalar, energetika, suv xoʻjaligi, qurilish materiallari sohasida oʻtkazilgan biznes-forumning samarali natijalarini olqishladilar. Ikki mamlakat ishbilarmon doiralari, jumladan, Oʻzbekiston Savdo-sanoat palatasi va Finlandiyaning “EastCham Finland” kompaniyasi oʻrtasidagi aloqalarni kengaytirish zarurligi taʼkidlandi.

Ekspertlarning oʻzaro tashriflarini tashkil etish, oʻqituvchi va talabalar almashinuvi dasturlari, qoʻshma loyihalarni amalga oshirish orqali taʼlim sohasida hamkorlikni rivojlantirishga alohida eʼtibor qaratildi.

Vazirlar BMTning Orolboʻyi mintaqasi uchun inson xavfsizligi boʻyicha koʻp sheriklik Trast fondi doirasidagi hamkorlikni chuqurlashtirish yuzasidan fikr almashdilar.

Parlamentlararo muloqotni faollashtirish va mintaqaviy tuzilmalar doirasidagi hamkorlikni mustahkamlashdan manfaatdor ekani tasdiqlandi.

• Tashqi ishlar vazirligi
• YXHT