“Jamoatchilik orasida poytaxt avtobus yo‘nalishlarini tutash hududlargacha uzaytirish vazifasi bo‘yicha savollar kelib tushmoqda.

Ma’lum qilamiz:

Davlat rahbarining Toshkent viloyatining barcha hududlarini poytaxt bilan bog‘lashga qaratilgan topshirig‘i ijrosi doirasida bir qator ishlar amalga oshirilmoqda. Hozirda qayta tashkil etiladigan, jumladan aglomeratsiya hududini qamrab oladigan yo‘nalishlar bo‘yicha tegishli hujjatlar ishlab chiqilmoqda.

Yo‘nalish hujjatlari tasdiqlanganidan so‘ng, ular o‘rnatilgan tartibga ko‘ra ochiq elektron tenderga joylanadi va tender g‘olibi bilan mazkur yo‘nalishda xizmat ko‘rsatish bo‘yicha brutto-shartnoma imzolanadi.

Yo‘nalishlar masofasi uzaytirilayotgani munosabati bilan, avtobuslarni kutish vaqti cho‘zilib ketmasligi uchun qo‘shimcha transport vositalari ajratish rejalashtirilgan.

Shuningdek, texnik va tashkiliy masalalar, harakat xavfsizligi hamda infratuzilmani ta’minlash ishlari amalga oshirilmoqda.

Poytaxt aglomeratsiyasida yagona transport tizimini shakllantirish chora-tadbirlari bosqichma-bosqich amalga oshirilmoqda.

Avtobus yo‘nalishlarini uzaytirish va yangi yo‘nalishlarni yo‘lga qo‘yish jarayoni belgilangan tartib va texnik talablar asosida amalga oshirilmoqda. Bu ishlar natijasida poytaxt va Toshkent viloyati aholisi uchun qulay, xavfsiz va barqaror transport xizmati yo‘lga qo‘yiladi” - deyiladi Toshkent shahar transport bosh boshqarmasi bergan rasmiy xabarda.

• Jamoat transporti
• Jamoat xavfsizligi
• Toshshahartrans
• Transport