Shavkat Mirziyoyev 15-may kuni “Coca Cola” kompaniyasi raisi va bosh direktori Jeyms Kuinsini qabul qildi. Bu haqda Prezident matbuot kotibi xabar berdi.

Qayd etilishicha, uchrashuvda “Anadolu Group” kompaniyasi raisi Tunjay O‘zilxon ham ishtirok etgan.

“Coca Cola” alkogolsiz ichimliklar ishlab chiqarish bo‘yicha dunyodagi eng yirik kompaniyalardan biri bo‘lib, faoliyati 200 dan ortiq mamlakat bozorini qamrab oladi, 200 dan ziyod brend va 950 dan ortiq ishlab chiqarish korxonasiga ega.

Kompaniyaning O‘zbekistondagi eksklyuziv hamkori – “Coca Cola İçecek” Turkiyaning “Anadolu Group” tarkibiga kiradi. Hozirgi kunda mamlakatimizda kompaniyaning Toshkent, Urganch va Namangan viloyatidagi 3 ta zavodi faoliyat yuritmoqda.

Uchrashuvda oziq-ovqat sohasidagi, shu jumladan “yashil” yechimlarni, energiya va suvni tejaydigan texnologiyalarni joriy etish bo‘yicha hamkorlikning ijobiy sur’ati qayd etilgan. Shuningdek, bugun Samarqand viloyatida yangi korxona ishga tushirilgan. 2025-yilda Namangan viloyatida beshinchi zavod foydalanishga topshiriladi.

“Innovatsion faoliyat va tadqiqotlarni rivojlantirish, muhandislar va soha mutaxassislarini tayyorlash muhimligi ta’kidlandi. Investitsiya dasturini yanada kengaytirish, mahsulot turlarini ko‘paytirish, materiallar va butlovchi qismlarni ishlab chiqarish yuzasidan kelishuvlarga erishildi”, deyiladi xabarda.

Davlatimiz rahbari istiqbolli loyihalarni tezlashtirilgan holda amalga oshirish bo‘yicha alohida “yo‘l xaritasi”ni qabul qilishni topshirgan.

• Prezident
• uchrashuv