Shavkat Mirziyoyev Umraga borish istagida bo‘lgan, ammo mablag‘i yetmayotgan ayrim fuqarolarga yordam berishini bildirdi. Davlat rahbari bu haqda 17-fevral kuni Buxoro shahridagi Mir Arab madrasasiga tashrifi paytida aytib o‘tdi.

Prezident madrasa talabalari bilan uchrashuv chog‘ida so‘nggi yillarda Umra va Haj safarlariga qatnov soni ko‘paytirilganini ta’kidlagan.

“Umraga xohlagancha ruxsat berilyapti. Haj safarlari karra-karra ko‘paydi. E’tiqod insonning yuragida, bag‘rida, ko‘nglida bo‘ladi”, — deydi davlat rahbari.

Shundan so‘ng Shavkat Mirziyoyev muftiy va talabalarga yuzlanib, bu boradagi taklif bo‘lsa, eshitishga tayyor ekanini bildirgan. Nuriddin hoji Xoliqnazarov Umraga borish imkoniyati bo‘lmagan kam ta’minlanganlar uchun davlat tomonidan yordam berilishini so‘radi.

“Sizdan bitta iltimos bo‘ladi, adolatli tanlov qilib bersangiz, xohlaganingizcha yordam beraman. Haqiqiy kam ta’minlanganlar istagi, albatta, ijobat bo‘ladi. Ularning ro‘yxatini shakllantirib bering. Kerak bo‘lsa, u yerdagi rahbarlarga ham aytib, ularni alohida-alohida kutib oladigan qilib tashkillashtiramiz”, — deydi prezident taklifga javoban.

• Muftiy
• Shavkat Mirziyoyev
• Umra