Merey Omonboyevaga sud hukmi o‘qildi. U Navoiy shahar hokimi nomidan foydalangan holda tadbirkorning ko‘p miqdordagi pulini qo‘lga kiritgan.

Savdo-sanoat palatasi Navoiy viloyati boshqarmasi boshlig‘i Merey Omonboyeva juda ko‘p miqdorda firibgarlik jinoyatini sodir qilganlikda aybli deb topildi. Sud hukmiga ko‘ra, u Navoiy shahar hokimi nomidan foydalanib, tadbirkorning ko‘p miqdordagi pulini qo‘lga kiritgan hamda o‘z ehtiyoji uchun sarflab yuborgan.

Xususan, “Bright industry buildings the future” MChJ rahbari M.Rahmatovni Navoiy shahar hokimi Dilmurod Ergashevga qarz berishga ko‘ndirgan hamda pulni o‘zi yetkazishi kerakligini aytib undan katta miqdordagi pulni olgan. Tadbirkordan hokimga qarz sifatida berish uchun 2023-yil 1-oktyabrdan 18-noyabrga qadar 56 mln so‘m va 23 ming AQSh dollari, jami 338 mln so‘m miqdoridagi pulni qo‘lga kiritgan.

Sud hukmi bilan Merey Omonboyeva Jinoyat kodeksining 168-moddasi 4-qismi “a” bandida (juda ko‘p miqdorda firibgarlik) nazarda tutilgan jinoyatni sodir etganlikda aybli deb topilgan.

Sud Merey Omonboyeva ayol kishi ekani, muqaddam sudlanmaganligi, ijtimoiy foydali mehnat bilan shug‘ullanayotganligi, “Mahalla iftixori” ko‘krak nishoni hamda Zulfiya nomidagi davlat mukofoti bilan taqdirlangani, yetkazilgan zarar qoplanganini hisobga olib, Jinoyat kodeksining 70-moddasiga (Shaxsning ijtimoiy xavflilik xususiyatini yo‘qotishi munosabati bilan uni jazodan ozod qilish) asosan jazodan ozod qilishni lozim deb topgan.

• Firibgarlik
• Jinoyat