Xabaringiz bor, joriy yil 24-dekabr kuni Rossiya prezidenti Vladimir Putin jurnalistlar va jamoatchilik faollari ishtirokida yillik matbuot anjumanida ishtirok etdi. Tadbirda mamlakat prezidentiga turli mavzularda savollar berildi va javoblar olindi.

Xabardor.uz ayni ko‘rinishda O‘zbekiston Prezidenti Shavkat Mirziyoyev ham keng jamoatchilik vakillari uchun matbuot anjumani tashkil qilsa, ular mamlakat taqdiri bilan bog‘liq qanday savollarni bergan bo‘lar edi, mazmunida kichik so‘rovnoma o‘tkazdi.

So‘rovnomaga ijtimoiy faol fuqarolar, shuningdek, jurnalistlar jalb qilingan.

Xo‘sh, O‘zbekiston Prezidenti matbuot anjumani o‘tkazganda jurnalist va faollar qanday savollar bergan bo‘lar edi?..

Quyida so‘rovnoma ishtirokchilarining davlat rahbariga bermoqchi bo‘lgan savollarini keltiramiz.

Zafarbek Solijonov, bloger:

– O‘zingizning islohotlaringizdan o‘zingizning ko‘nglingiz to‘lyaptimi?

Mavjuda Xolmatova, “Xalq so‘zi” gazetasi xodimi:

– Shuncha oltinimiz, tabiiy boyliklarimiz, unumdor yerlarimiz bo‘lgani holda nega biz qashshoqmiz?

Kamoliddin Rabbimov, siyosatshunos:

– Muhtaram Prezident, O‘zbekistonda tuman va viloyatlar hokimlari saylovini qanday tasavvur qilasiz? Bu qachon yo‘lga qo‘yilishi mumkin? Hokimlarni saylanishida, ya’ni bu mexanizmni joriy qilishda qanday siyosiy risklar bo‘lishi mumkin? Hokimiyat vertikalini o‘zgartirganda O‘zbekiston davlatchiligini o‘zgarish davrida qanday muammolar yoki qanday bir vazifalar kutishi mumkin?

Farrux Jabborov, jurnalist:

– Keyingi saylovda konstitusiyani buzmaysizmi? Yoki o‘zingizga moslab o‘zgartirib olmaysizmi?

Abror Zohidov, “Kun.uz” sayti muxbiri:

– Men davlat rahbariga bir necha marta bevosita savol berishga ulgurganman. Shu bois men uchun hamkasblarning savollari qiziq.

Anora Sodiqova, “Rost.24” nashri bosh muharriri:

– Qaysi kuyovingizni ko‘proq yaxshi ko‘rasiz, deb savol bergan bo‘lardim.

Barno Sultonova, “Xabar.uz” nashri muxbiri:

– Yaqinda amal berib arqonni uzun tashlab qo‘yaman dedingiz, agar sir bo‘lmasa bu arqon qachon tortiladi?

– Germaniyada yer osti qazilma boyliklarini ko‘mib tashlashgan ekan. Kovlab o‘zlariyam foydalanishmas va sotmas ham ekan. Kelajak avlodlarga qoldirish maqsadida. Biz ham qazilma boyliklarimizni ko‘mib tashlasak bo‘lmaydimi?

Solijon Yahyoyev, “Amerika ovozi” muxbiri:

– 3 ta  savolim bor. Ana shu savollarimga O‘zbekistonning amaldagi  prezidenti Shavkat Mirziyovdan javob olsam, xursand bo‘lardim.

– Prezidentligingizning ikkinchi muddati tugagandan so‘ng (bu yerda 10 yil nazarda tutilyapti, Konstitutsiyaga va qonunlarga o‘zgartirishlar kiritib muddatni sun’iy ravishda uzaytirgan holda emas) o‘zingizni qaysi ishga bag‘ishlamoqchisiz?

– Uchinchi muddatga prezident vazifasiga qolishingizni so‘rab murojaatlar tushsa, sizning qaroringiz qanday bo‘ladi? Qaysi holatda davlat rahbari vazifasida qolishingiz mumkin, qolmaydigan bo‘lsangiz nega?

– Har gal farmon va qarorlaringizni qabul qilayotganda, qonunlarga imzo chekayotganingizda birinchi galda kimni o‘z ko‘zingiz oldiga keltirasiz? Nimaga?

Ma’lumot uchun, Xabardor.uz yuqoridagi so‘rovi bo‘yicha murojaat qilgan o‘nga yaqin jurnalist va faollar sukut qilishni afzal bilishdi.

Hurmatli o‘quvchi, siz-chi? Sizning davlat rahbariga beradigan savollaringiz bormi?..

• Matbuot anjumani
• Mirziyoyev
• Prezident