Pxenyanning yadroviy zarbasi Qo'shma Shtatlar va Koreya Respublikasining javob "hal qiluvchi harakatlariga" sabab bo'ladi va KXDRda "rejimning tugashiga" olib keladi. Bu haqda Koreya Respublikasi prezidenti Yun Sek Yol Associated Press agentligiga bergan intervyusida aytib o‘tdi.

“Mamlakatlarimiz Shimoliy Koreyaning yadro qurolidan foydalangan holda har qanday hujumiga tezkor, halokatli va qat’iy javob qaytarilishini, bu rejimning barham topishiga olib kelishini yana bir bor tasdiqladi”, – dedi Janubiy Koreya rahbari.

"Kelajakda Amerikaning “keng qamrovli jilovlashi” Koreya Respublikasi va Qoʻshma Shtatlar oʻzaro muhokama qiladigan qoʻshma tizimga aylanadi. Biz Shimoliy Koreyadan keladigan har qanday yadro va raketa tahdidlarini oldini olish va ularga javob berish qobiliyatini kuchaytiramiz”, deya qo'shimcha qildi Yun Sek Yol.

“Keng qamrovli jilovlash” tizimi Vashingtonning ittifoqchini himoya qilish uchun barcha vositalardan, jumladan, yadroviy quroldan foydalanishga tayyorligini bildiradi.

Aprel oyidagi sammitdan so‘ng, AQSh va Janubiy Koreya prezidentlari Jo Bayden va Yun Sek Yol Vashington deklaratsiyasini qabul qilishdi, unda ittifoqchiga qilinadigan tashqi zarbani oldini olish salohiyatini namoyish etishga qaratilgan qator qadamlar sanab o‘tilgan. Ular orasida yadroviy rejalashtirish bo‘yicha maslahat guruhini yaratish, Koreya yarim oroli janubida Amerika strategik qurollarining paydo bo‘lish chastotasini oshirish va qo‘shma mashg‘ulotlarni kengaytirish kiradi.

• AQSh
• Janubiy Koreya
• Shimoliy Koreya
• Yadroviy qurol