Qashqadaryo viloyatining Gʻuzor tumanida aka o‘z ukasining oyoq-qo‘llarini sim bilan bog‘lab, tiriklayin yoqib yubordi. 

Gʻuzor tumani prokuraturasining Xabardor.uz’ga ma’lum qilishicha, qotillik jinoyati joriy yil 1-noyabr kuni sodir bo‘lgan.

Gʻuzor tuman prokuraturasiga tuman IIB navbatchilik qismidan kelib tushgan voqea haqidagi xabarga ko‘ra, tumanning “Pachkamar” MFY, Pachkamar qishlog‘idagi eski gips tosh konidan yoshi 30-35 larda bo‘lgan erkakning kuygan jasadi topilgani ma’lum qilingan.
Marhumning murdasi topilganida uning oyoqlari juft qilingan holda to‘piq sohasi, son sohasi va ko‘krak sohasidan sim bilan ikkala qo‘llari orqaga qayrilib bog‘langan holda bo‘lgan.

Mazkur holat yuzasidan 2-noyabr kuni Gʻuzor tuman prokuraturasi tomonidan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilib, gumonlanuvchi qo‘lga olingan.

Tezkor-surishtiruv davomida shaxsi noma’lum murda Gʻuzor tumani “Sovlig‘or” mahallasida yashovchi 38 yoshli E.A. ekani, ushbu jinoyatni sodir etgan fuqaro esa uning akasi 43 yoshli E.K. ekani ma’lum bo‘lgan.

Ma’lum bo‘lishicha, E.A. oilali va ikki nafar farzandning otasi bo‘lishiga qaramay, mast holda doimiy ravishda onasi S.D.ni uyatli so‘zlar bilan haqoratlab, janjal qilib kelgan. 31-oktyabr kuni soat 14:00 da mast holda onasi bilan yana janjallashib, uni haqoratlab uydan chiqib ketganini eshitgan akaning jahli chiqqan. U ukasi shu qishloqdagi choyxonada sinfdoshlari bilan spirtli ichimlik ichib o‘tirganini bilib, choyxonaga borib, ukasini o‘zining boshqaruvida bo‘lgan Gentra’da uyiga olib kelgan.

So‘ng uni urib, qo‘l va oyoqlarini sim bilan bog‘lab, shu kuni soat 22:00 da qasddan o‘ldirish maqsadida, o‘zining avtomashinasi yukxonasiga joylab, Gʻuzor tumani Pachkamar qishlog‘idagi adirlikka olib borgan va ustiga benzin sepib yoqib yuborgan.

• Jinoyat
• Prokuratura
• Qashqadaryo
• Qotillik