Kecha, 4-iyun kuni taxminan soat 7:20 da Qashqadaryo viloyati Qamashi tumani hududida Damas avtomobili daraga ag‘darilishi oqibatida 3 kishi halok bo‘ldi. Bu haqda Favqulodda vaziyatlar vazirligi matbuot xizmati xabar bermoqda.

Qayd etilishicha, yo‘l-transport hodisasi “Maydanak-Qiziltepa” avtomobil yo‘lining Kon qishlog‘i “Kattao‘ra” MFY hududidan o‘tuvchi 38-kilometr qismida ro‘y bergan. Haydovchining ehtiyotsizligi oqibatida mashina yo‘ldan chiqib ketib, daraga ag‘darilib ketgan.

Natijada avtomashina ichida bo‘lgan 3 kishi voqea joyida halok bo‘lgan, yana 3 kishi turli darajadagi tan jarohatlari bilan tuman shifoxonasiga yuborilgan.

Voqea joyiga viloyat FVB rahbariyati boshchiligida qutqaruvchilar, tuman hokimi va tegishli tashkilot vakillari yetib borib, qutqaruv ishlari amalga oshirilgan. Hozirda holat yuzasidan surishtiruv harakatlari olib borilmoqda.

• Avtohalokat
• O'lim
• Qashqadaryo