Xitoy kompaniyalari hamkorligida Qashqadaryo viloyatida kompyuter qurilmalari ishlab chiqarish yo‘lga qo‘yiladi. Bu haqda viloyat hokimligi axborot xizmati xabar berdi.

Ma’lum bo‘lishicha, loyihaning dastlabki qiymati 30 million dollar bo‘lib, unda yillik 1 milliondan ortiq mahsulotlar va qurilmalar ishlab chiqariladi.

“Xitoyda bo‘lib turgan viloyat hokimligining delegatsiyasi Shenjen shahridagi kompyuter texnologiyalari yo‘nalishidagi yirik kompaniyalar Shenzhen T.D.S Electronic Technology va xalqaro Intel kompaniyalari hamkorligida Qarshidagi erkin iqtisodiy zonada monoblok, noutbuk, ona platalar, videokartalar va boshqa kompyuter qurilmalari ishlab chiqarish bo‘yicha kelishuvga erishgan”, – deyiladi xabarda.

Mazkur investitsiyaviy loyiha 2024-yilning 4-choragida ishga tushiriladi. Unda 120 nafar xodim ish bilan ta’minlanadi. Bundan tashqari, xodimlarning aksariyati Xitoyda va xitoylik mutaxassislar ishtirokida O‘zbekistonda malaka oshiradi.

• Kompyuter
• Loyiha
• Xitoy