Prezident Shavkat Mirziyoyev kecha mustaqillikning 34 yilligi munosabati bilan o‘tkazilgan bayram tadbirida yoshlar va ilm-fan masalalariga ham alohida e’tibor qaratdi. Davlat rahbari nutqi davomida ayniqsa, turli fan olimpiadalarida nufuzli o‘rinlarni egallagan yigit-qizlarning natijalari timsolida bo‘lajak Xorazmiy, Beruniylarni ko‘rishini ta’kidladi.

“Biz Mustaqil Davlatlar Hamdo‘stligi mamlakatlari o‘rtasida kimyodan ikkinchi, matematika va iqtisodiyotda uchinchi, AT va geografiya bo‘yicha to‘rtinchi o‘rinni egallagan o‘g‘il-qizlarimiz timsolida bo‘lg‘usi Xorazmiylar, Beruniylar, Ibn Sinolarni ko‘ramiz.

Saflari tobora kengayib borayotgan bunday intiluvchan, iste’dodli yoshlar – Yangi O‘zbekistonning oltin avlodi, g‘ururimiz timsolidir.

Bugungi unutilmas damlarda men butun O‘zbekiston yoshlariga qarata aytmoqchiman.

Aziz farzandlarim, doimo yodda tuting: baxt – intilganniki, g‘alaba – kurashganniki. Kelajakni mardlar, tarixni g‘oliblar yaratadi.

Hamisha oldinga qarab intiling, bahodir o‘g‘lonlarim, oqila qizlarim!

Sizlarning ezgu ishlaringizda Vatan, xalq, Prezident barchangizga hamisha tayanch va suyanch bo‘ladi” – dedi Prezident.

• Olimlar
• Olimpiada
• Oliy ta'lim, fan va innovatsiyalar vazirligi
• ilm-fan