Britaniya matbuoti bergan xabarga ko‘ra, Aleks Batti ismli bolakay 2017-yilning sentyabrida bobosi va onasi bilan Ispaniya janubidagi Marbela shahriga sayohatga chiqqan va sayohat davomida qochib ketib izsiz yo‘qolgan.

O‘sha paytda u 11 yoshda bo‘lgan. Uydagilarning qidiruv harakatlariga qaramay Aleks topilmagan. Ma’lum bo‘lishicha uning qochib ketishiga oilaviy Finlyandiyaning kichik qishlog‘iga ko‘chib o‘tishgani sabab bo‘lgan. Aleks Angliyadagi hayotiga qaytish istagi bilan sayohat vaqtida qochib ketgan.

Oradan 6 yil o‘tib bedarak yo‘qolgan bola 13-dekabr kuni Fransiyaning Revel shahrida buvisiga Facebook ijtimoiy tarmog‘i orqali aloqaga chiqqan. Bunga yuk mashinasi haydovchisi yordam bergan. Izsiz yo‘qolgan yigitcha 6 yil mobaynida boshidan nimalar kechirgani haqida hali matbuotga gapirib bermagan. Biroq ko‘p qiyinchilik ko‘rgani va uyga qaytishni xohlayotganini aytgan. Ma’lum bo‘lishicha, 6 oy oldin bolakayning bobosi bu dunyoni tark etgan. Onasi esa farzandini topish ilinjida sayohatlarga chiqib, turli joylarni ko‘zdan kechiradi.

Aleks oxirgi 4 kun davomida tunda yurganini va kunduzi dam olganini, qo‘lida faqat chiroq, ryukzak, 100 evro borligini ma’lum qilgan.

U buvisiga Facebook’dan: “Salom buvi, bu men Aleksman. Men Fransiyaning Tuluza shahridaman. Umid qilamanki, siz mening xabarimni ko‘rasiz. Men sizni yaxshi ko‘raman va uyga qaytmoqchiman”, deb xabar qoldirgan. Tez orada Aleks oilasi davrasiga qaytariladi.

• Fransiya
• Ispaniya