Kecha, 22-fevral kuni Italiyaning Milan va Kortina-d’Ampetsso shaharlarida o‘tkazilgan XXV qishki Olimpiya o‘yinlari rasman yakunlandi. Musobaqalar doirasida 116 ta medallar jamlanmasi o‘ynaldi.

Umumiy medallar hisobida Norvegiya terma jamoasi birinchi o‘rinni egalladi. Skandinaviyaliklar 18 ta oltin, 12 ta kumush va 11 ta bronza medaliga ega chiqdi. Jami 41 ta medal bilan norvegiyaliklar qishki Olimpiada tarixida eng ko‘p mukofot jamg‘argan jamoa sifatida yangi rekord o‘rnatdi.

Avvalgi rekord ham shu mamlakat sportchilariga tegishli edi — 2018-yili Janubiy Koreyaning Pyongchang shahrida o‘tgan olimpiya o‘yinlarida ular 39 ta medal jamg‘arishgandi. Norvegiya ketma-ket to‘rtinchi bor medallar hisobida yetakchilikni qo‘lga kiritdi. Milan va Kortina d’Ampetsso mezbonlik qilgan musobaqa tarixiy natijalar bilan yodda qoldi.

Medallar jadvalida ikkinchi o‘rinni AQSh egalladi. Amerikalik sportchilar 12 ta oltin, 12 ta kumush va 9 ta bronza medali qo‘lga kiritdi. Uchinchi pog‘onadan o‘rin olgan Niderlandiya terma jamoasi hisobida esa 10 ta oltin, 7 ta kumush va 3 ta bronza medallari mavjud.

Mezbon Italiya terma jamoasi 10 ta oltin, 6 ta kumush va 14 ta bronza medali bilan to‘rtinchi bo‘ldi. O‘yinlar Yevropa qit’asida o‘tkazilganiga qaramay, medallar taqsimotida skandinaviyaliklar ustunlik qildi. Bayroqsiz qatnashgan rossiyalik sportchilar faqat bitta kumush medal bilan kifoyalanishdi. Qozog‘iston esa 1994-yildan buyon o‘zining ikkinchi oltin medalini qo‘lga kiritdi.

Ma’lumot uchun, 2030-yilgi qishki olimpiada Fransiya Alp tog‘larida bo‘lib o‘tadi.

• Italiya
• Milan
• Qishki Olimpiada