Avvalroq, Farg‘ona viloyatining Qo‘qon shahrida joylashgan bozorda yirik yong‘in sodir bo‘lgani xabar qilingan edi. Qayd etilishicha, bozorda yonib ketgan do‘konlar 15 kunda qayta qurib berilishini ma’lum qilingan.

Viloyat hokimligi matbuot kotibiga ko‘ra, qurilish ishlari 15 kun muddatda yakunlanadi va buning uchun yetarli quruvchilar jalb etiladi. Qurilish ishlari uchun tadbirkorlardan umuman pul olinmaydi. Barcha ishlar bozor ma’muriyati hisobidan amalga oshiriladi.

“Viloyat hokimligi qurilish ishlari 15 kun muddatda yakunlanishini, buning uchun yetarli quruvchilarning jalb etilishini ta’minlaydi va nazoratga oladi. Qurilish ishlari uchun tadbirkorlardan hech qanday mablag‘ olinmaydi. Barcha ishlar bozor ma’muriyati hisobidan amalga oshiriladi, buning uchun ma’muriyatga yetarli bank krediti taqdim etiladigan bo‘ldi”, – deya ta’kidlagan viloyat hokimligi matbuot kotibi Dilmurod Jumaboyev.

Hozirda zarar miqdorini aniqlash ishlari davom etmoqda.

Eslatib o‘tish mumkin, 12-iyun kuni soat 19:17 da Qo‘qon shahrining Baynalmilal ko‘chasida joylashgan “Buyuk ipak yo‘li” savdo kompleksi hududidagi do‘kon rastalarida yong‘in sodir bo‘layotgani to‘g‘risida xabar kelib tushgan va FVB xodimlari va mahalliy aholi tomonidan 4 soatdan ortiq vaqt davomida o‘chirilgan.

• FVB
• Hokimlik
• Qo'qon
• yong‘in