Kuni kecha, 13-avgust kuni “Humo Arena”da Lift Promotions kompaniyasi tomonidan tashkil etilgan professional boks oqshomi boʻlib oʻtdi.

Unda Fazliddin Gʻoibnazarov, Shahobiddin Zoirov, Mirazizbek Mirzahalilov, Lazizbek Mullojonov, Abbosxon Yoʻldoshev va yana bir qator oʻzbekistonlik bokschilar ringga koʻtarilishdi.

Natijalar bilan tanishing:

Asosiy kard

Fazliddin Gʻoibnazarov (Oʻzbekiston) – Jadiyer Parra (Venesuela): Gʻoibnazarov 10 raundga moʻljallangan jangning 38-soniyasida raqibini nokautga uchratdi.

Ebert Souza (Braziliya) — Denni Mendoza (Nikaragua): Olimpiada chempioni Souza professional debyut jangida 2-raundda texnik nokaut evaziga gʻalaba qozondi.

Shahobiddin Zoirov (Oʻzbekiston) – Xerson Larios (Nikaragua): Zoirov 6 raundga moʻljallangan jangning 20-soniyasida raqibini bitta zarbada chuqur nokautga uchratdi.

Jediyer Errera (Kuba) – Mauro Peroune (Argentina): Peroune 7-raundda jarohat olgani bois shifokor jangni davom ettirishga ruxsat bermadi va shu davrgacha boʻlgan ochkolar boʻyicha Erreraning gʻalabasi qayd etildi.

Lazizbek Mulllojonov (Oʻzbekiston) – Maykl Basset (Britaniya): Mullojonov 2-raundda raqibni texnik nokautga uchratgan holda muddatidan oldin gʻalaba qozondi.

Mirazizbek Mirzahalilov (Oʻzbekiston) – Islam Torobayev (Qirgʻiziston): Mirzahalilov ham texnik nokaut evaziga raqibini magʻlub etib gʻalaba qozondi.

63,5 kg Gran-Pri turniri

Mujibillo Tursunov (Oʻzbekiston) – Rahmatillo Sharipov: Tursunov prof yoʻnalishdagi debyut jangini muvaffaqiyatli oʻtkazib, ochkolar hisobida gʻalaga qozondi.

Abbosxon Yoʻldoshev (Oʻzbekiston) – Shohruhbek Kenjayev (Oʻzbekiston): Toʻliq 6 raund davom etgan jangda Kenjayev ochkolar hisobida gʻalaba qozondi.

Timur Abdurahmonov (Oʻzbekiston) – Farrux Arslonov (Oʻzbekiston): Arslonov ochkolar hisobida gʻalaba qozondi.

Dastanbek Imankaziyev (Qirgʻiziston) – Dilshad Nurim (Qozogʻiston): Nurim raqibini 3-raundda texnik nokautga uchratgan holda gʻalaba qozondi.

Qayd etish mumkin, kechagi oqshomga boks boʻyicha ogʻir vazn toifasida IBF, WBA va WBO yoʻnalishlari jahon chempioni Oleksandr Usikning menejeri Egis Klemas ham tashrif buyurdi. Chunki u hamyurtimiz Fazliddin Gʻoibnazarovning menejeri hisoblanadi.

Shu tariqa, Lift Promotions kompaniyasining Toshkentda tashkil etgan ilk katta jang oqshomi yakunlandi.

• Boks
• O‘zbekiston