Ma’lum qilinishicha, Qorabog‘dagi Xonkendi (Stepanakert) - Askeran trassasidagi yoqilg‘i saqlanadigan omborxonada portlashda kamida 20 kishi halok bo‘ldi. Bu haqda tan olinmagan Tog‘li Qorabog‘ning Sog‘liqni saqlash vazirligi xabar berdi.

Bildirilishicha, portlash joyida 13 nafar noma’lum jasad topilgan, ular ekspertiza uchun yuborilgan, shuningdek, yetti kishi shifoxonada vafot etgan.

“Ko‘p odamlar bedarak yo‘qolgan deb hisoblanmoqda”, deyiladi xabarda.

Aytilishicha, portlashdan so‘ng turli darajadagi kuyishlar bilan jami 290 kishi tibbiyot muassasalariga yetkazilgan.

Ozarbayjon markaziy hokimiyati Xonkandidagi portlash qurbonlarini davolash uchun tibbiy yordam yubordi.

“2023-yilning 25-sentyabr kuni Xonkandi shahri yaqinidagi yonilg‘i quyish shoxobchasida portlash sodir bo‘ldi. Ma’lumotlarga ko‘ra, hodisa oqibatida ko‘plab qurbonlar va jarohatlanganlar bor. Shu munosabat bilan jabrlanganlarga yordam ko‘rsatish maqsadida 200 kishini davolash uchun kuyishga qarshi tibbiy buyumlar, bog‘lamlar, qo‘lqoplar, dori-darmonlar (spreylar, kremlar, og‘riq qoldiruvchi vositalar, antibiotiklar va boshqalar) bo‘lgan tez tibbiy yordam mashinasi yuborildi”, - deyiladi Ozarbayjon prezidenti ma’muriyati xabarida.

O‘z navbatida Armaniston Sog‘liqni saqlash vazirligi zarur tibbiy asbob-uskunalar va dori-darmonlarga ega shifokorlar guruhi portlashda yaralanganlarga yordam ko‘rsatish uchun Xonkandiga vertolyotda uchib ketganini ma’lum qildi.

• Armaniston
• Tog‘li Qorabog‘
• Xayrullo Bozarov
• portlash