Ijtimoiy tarmoqlarda ko‘pchilikning munozarasiga sabab bo‘lgan masala Qo‘yliq bozorining ko‘chishi bo‘lib qoldi. Bozor xizmatchilari, sotuvchilar va bozordan non topayotgan qolgan barcha fuqarolar bu qarorga o‘zining noroziligini bildirgandi. 

Bozorning havfsizlik bo‘yicha direktor o‘rinbosari Qodirjon Normirzayev O‘zbekiston milliy axborot agentligiga bergan intervyusida Qo‘yliqning yangi bozorga ko‘chirilishi bo‘yicha hali shahar hokimiyatidan hech qanday xabar olinmaganini, bu bo‘yicha ogohlantirish xatlari ham yuborilmaganini aytgan. "Mendagi ma’lumotlarga ko‘ra, bozor buzilmaydi", – deydi bozor ma’muriyati vakili. 

Kuni kecha bo‘lib o‘tgan Bektemir tuman Xalq deputatlari kengashining navbatdagi sessiyasida ham ushbu masala ko‘rib chiqilgan. Bu haqda Yoshlar telekanalida tayyorlangan lavhada so‘z boradi.

Sessiyada tuman hokimi bozorning buzilishini ta’kidlagan. Shuningdek, hokim bozor sotuvchilarining 3 oyga qadar patent puli to‘lamasligini ham aytdi. 

Sessiyada so‘zga chiqqan Bektemir tumani hokimi Tapil Muxamadziyayev "Foodciti'da shundoq sharoitlar yaratilganki, hurmatli OAV, hurmatli deputatlar, o‘zimizning ekobozordayam yo‘q.(Sotuvchi) Qo‘yliq o‘tirib, asfaltda o‘tirib sotganidan ko‘ra, o‘sha yerga oborib sotgani ma’qul" – dedi. 

Hokimning so‘zlariga ko‘ra, Qo‘yliqda kadastr hujjatlariga ega barcha tadbirkorga ko‘rilgan ziyonni davlat qoplaydi. "Kadastri borlarga, albatta, davlat tomonidan, qoplab beriladi hamma ziyoni. Yuz foiz qoplab beriladi" – deydi hokim. 

Hokim bozorning ko‘chishi bosqichma-bosqich ro‘y berishini ta’kidladi. Bundan tashqari, 3 oy sotuvchilardan patent puli olmaslik sharti ham kelishilgan.

Avvalroq bozordagi tadbirkorlar va ishchining 31-dekabrga qadar yangi bozorga ko‘chishlari lozimligi haqida ogohlantirish olganliklari haqida xabar qilingandi.

• Bozor
• Toshkent